Poesie Meneghine

by Camillo Cima

Ai mè fioeu

Ciappee fioeuj! Adess sarii content!
Hin chì i mee poesij, podii vedèj:
E sont sicur, a part i compliment,
Che se ve piasen, i trovarii bèj.

Soo ben che vialter, cont el vost talent,
Sii bon de dì che avriss faa molto mèj
A dav, in loeugh d'on libr'inconcludent,
Cent mila lir, magara in tant cinqu ghèj.

Porta nagott! Mi foo quell che poss,
Miracoj ne fa pu nanca el Signor...
Ciappell, sto liber, che l'è già on quaicoss.

L'è fors l'ultim regall che mi ve foo...
Dopo 'vev tiraa sù bèj grand e gross,
E all'ordin de mangiamm la pappa in coo!

Milano, dicembre 1887

Denanz al consilli de disciplina

Prefazion

(Milano, luglio 1887)

Tanto temp fa, quand hoo stampaa sta storia
M'hinn saltaa adree a dimm tucc che fava mal
A teugh el merit, a seccagh la gloria,
A ciappà in gir la Guardia Nazional:
Ma peù, col temp, s'è vist ch'el poer poetta
L'aveva induvinaa mèj d'on profetta!!

― Pivèj che sii nassuu in la bombasina
E podii gôd adess tanti provecc,
Femm sta finezza, degh on'oggiadina
Ai seccadur che gh'emm avuu nun vecc,
(Senza cuntà peù el rest de l'infilada)
Per preparav la pappa bell'e fada.

Denanz al consilli de disciplina (1865)

T'ee faa benon, Cecchin, teù el permess
De fermass chì con mì tutta matina
Inscì te poss cuntà coss'è success
Con quell consilli ciall de disciplina
Giust in d'on temp che ghe l'aveva sù
Che 'l me stava sul goss de podenn pù.

T'ee de savè, el mè car, che on poo per vizzi,
On poo perchè me manca el temp de fall,
Mi monti mai la guardia, e che al servizzi
Me cocchen mai nanca ona volta in fall:
Nanch se vegness a teumm el tamborin,
Minga cont el biliett, ma col scovin.

L'è natura che tutt st'antipatia
Mi g'hoo i mee bèj e bonn reson de avella;
Ma anben che cerca de no famm teù via,
Ogn trè bott-i-dò sont in quarella:
Me manden a ciamà coi citazion,
Per refilamm di mult o la preson.

Injer matina, giust, sont andaa là
Al consilli tremend, per quaj mancanz:
Voo dent, stoo lì dò ôr a segrinà;
Me ciámen, salti sù, corri denanz
De la sbarada in faccia al president
E me pienti lì in pee senza sì nient.

Intant che rughen dent in di palpee
Per cercà foeura el corp del mè delitt,
Ghe doo on'oggiada a tucc qui car belee,
Vegnuu sù grand e gross cont el petitt
De fà de boja intorna al tavolon,
Quattaa cont el tappee color verdon.

Che tavol! che tappee! Se pò dì insomma
Che l'è ben longh e largh tantquant on praa!!
E el podarav, vorend, fàgh sù la tomma
Vun de quij adesn che gh'è in gir settaa!
Tutt pien de lêg, de protocoj, de carta...
El par el post di meder d'ona sarta.

[...]