Podas Okus
Li dagalob? li eslipob?
- Löfäb obik, li jepol nogo?
Vegeds dlenas su cigs olik
- Nidoms, glifol obi vanlo;
Mufon lai! mufon bived!
- Flum sabagloka nevifik jonom
Das tim e lif fegoloms fovo;
- Myrmidons valik seiloms atimo.
Automedon, li pexilom
- De solatöp len bed obik?
Al kiöp Agamemnon egolom?
- Kiöp binom Diomed kligik?
Kiöp Nestor? e kiöp Ulysses?
- Menelaus, kiöp binom?
Letolös omis, kids olik binoms
- Löfikum obe ka pükats omsik.
Delalit mogolom e neit sukom,
- Apollo gletik düsom glöpi
Omik, kö mel e sil kokömoms,
- God neflenik len ob e obik.
Flumöl da yan veitik teneda,
- Sümöl tuvate glola seledik,
Solalit golüdik slifom, nidöl
- Su hels olik golüdik e nidik.
No blamolös saneli zogöl,
- Yuf do sefikün okömom tulato;
Mödo sefikum sagit de Paris
- Peduköl fa Phœbus e fa Parcæ;
Ven et elubäkom po nufün,
- If ilenlogobla, balna logedi,
Phœbus öm it ikanomöv töbo
- Stilön nevis nama dlemöl.
Athena löfik, ko logs yulibik!
- Jigod! Vilgin sapik e kinik!
Ävilolöv savön löfäbi olik
- De jemäds tlätik fa Polyxena.
Sagolös, jens at, kelis sufobs,
- No li binoms legudikün?
No kanoms jänön büdi de Jove,
- Om e Parcæ lebüdoms otosi.
Mödiks sükoms püdi ko lieg,
- Lifatimi lonedik e lifi takedik;
Esükob dini te bal, keli
- Löfob mödikumo ka etis.
E zu elilob ofen koni,
- Du pulüp obik, tefü cödät
Keli Parcæ ilasigoms obe -
- Gloli, kobü deil sunik.
Lengon vifik e sebun süpitik
- Futü daem nebü Troya;
Manövs tlupas golöl e fugöl,
- Kligavok kleilik e topets voköl;
Tons palsiämik kliga devik,
- Cöp e stigam e gleip vutik,
Glafs kels tonoms su jüls kojoköl,
- Säbs kels kötoms, speds kels hogoms; -
Elovegivob levelo atis;
- Len mel tonodöl kleiliko,
Kö speds äs rids triloms, spadöp
- Nonik obinom desnu plo ob.
Milit obsik lunom vädelo
- Deülobs vädelo in pugs isik;
Ab sons obsik ofinoms kligi,
- Kö mens bliboms mens mutoms funön.
Sagon das lif binom svidik
- E deil biedik menes valik;
Kikod sag at, o mot Thetis!
- Nek kanom vanön cödati fa Jove?
Binob löbik, binob vilöfik,
- Klemön lifi tepik oba;
Evedob fenik dub säben lonedik,
- Pesatob löliko dub klig at laik.
Efänob dagiko deili blefikum
- Obe, su bed saba peledöl;
Feitöl nämiko, deilöl jekiko,
- Ko lips seilik, e nam flapöl;
Ab lifs tönikün binoms blekik,
- E mens kinikÜn, jameps gudikün,
Faloms nefikulo - veütos nemödo;
- Desidob atimo te getön takedi.
Elogob säbeni mölodik säto,
- E flumi ledik in Scamander,
Bludi hitik seflumöl äs vat,
- Elogob funis pekumöl su meids.
Osagon, "ebinom nemisaladik,
- Nen pid, vinditik e jalepik;"
Nemödiks nezepöl ovögodoms,
- U osüemoms dinis gudikum.
Pükolös! fils lifa flamotoms fibiko,
- Äs lit lutikälik lulaka,
Li ebinob nen fek äl flen?
- Li ebinob nemolik äl vom?
Lad obik peböl li eblinom
- Tikis säbena soalo al flom?
Mürolös! jipul seilik dlenöl!
- Patroclus edeilöl! gepükolös!
Sigolös logis violetik nidöl,
- Löfäb, lifüp obik pefinom;
Egivöl nami obe lilolös,
- Büfo lan nämik ocöpom vegi
Da fog deila veböl sus ob,
- Äs naf stamik dukötom meli,
Al pals obik kels ebigoloms,
- Al gods kels löfoms menis kinik.
Lanimö! mutoms ditön zelado;
- Jads kels disoms ekels xänoms
Pemigöl jinoms äs funaklot,
- E tegoms logis fenik oba.
So lulit stilik jinom dagön
- Memi felas kiöp etevobs
Du dels litikum e yofikum -
- Nu niludob das fin nilom.
Bi nam kel tönom finedis olik,
- Kiköl gleipi spanik deila,
Senom töbo vami bliböl,
- Noetom töbo pedi leitik;
Dü peb nenämik kel levotom,
- Cenom dub kalod vatöfik deila,
Nen nomomaf, paudöl fibiko,
- Äs flam deilöl litapola.
Li tikol, löfäb, lan obik oglifom
- In regän Hades, kö jameps nidoms,
If ba olilob jepani luglolöl,
- Komü jilumatel de Argos?
Luglolomöd, vikodel jipulik.
- Tuvemomöd; no somo, niludob,
Lors pesäslütoms deü Hector
- Büfü bevüp leno lonedik.
Vög obik li vedom nökebalädik?
- Nam obik li binom vamik no fovo?
Dälolös snekön nogna lami
- Zi nökeb kö magäbs jinoms dagik;
E pladön kapi su jot otik,
- Kö etakedomofen elso;
Vietik e vamik, ye jinöl obe
- Umo kalodik ka ejinom vöno.
Citam jisona de Priam efunom
- Obi, no stenüd sona omik -
Flagolös leno kikod esükob
- Ofi, cödät obik pefinom.
Binol velato vemo jönikum
- E milna löfikum obe ka of.
Kömolös, ladal, lamolös nilumo,
- Cütolös deili dö stig lafik.
Dü helem olik äs lektoin,
- Disigifom lömibi golüdik,
Dälolös obe dlinön nevifo
- Kidis posenöl fovo negelo;
Ye säls in Elysium binoms
- Gletik, ba gods benälik ogevoms
Siedi lä ob semöpo - kim nolom?
- Düsolös obi - dälolös slipön!
Düsolös umo, siens obik
- Tevoms, e lan jinom rölinön
Ko bän in Scamander vifik
- Spidöl al zeil nelogik obe.
In lils obik, äs töm fagik
- Vatalubelas su jol mela.
Mür lovatonom, tonodöl fibiko,
- Binos ga flap guba fa Charon.
Düsolös umo, Briseis öbik,
- Jads solüdikum dagoms liti;
Seilö, kelos pelonos, jenos,
- Kikolös logis, sagolös neiti
Gudik. Pladolös lipis, kidöl,
- Su mud kalodik, du bigafineds
Olik pedoms logasimis kalodik -
- Pallas! solat kömob somo!
- (Pelovepolöl fa Red.)
NOTEDONÖS. - Poedots de Gordon binoms luvelatiko popikum bevü Talopels ka vobäds poedela alik votik de Talop. Mödiks de vobäds omik kaladikum bepenoms rönis e duinis monitelik, i binugi in laned foetik de Talop. Ats binoms liegöfik tefü liföf e fek, ab ninlaboms pükönabidis kaenik e votikis kels no labomsleigikis in Volapük. Kanon düvön "Podas Okus" as amadi gitälik de vobäds poedela at, ven vim omik ebinom umo klatelik.
Pokasegivot nedelidik de vobäds poedela atpepübom Nelijapüko fa Söls A. H. Massina e Ko., pübels, Melbourne, Talop. Suäm, fr. 3.
Se Kosmopolan 1891, Nüm: 2, Pads: 6-9.