Plogam obsik

From Wikisource
Jump to navigation Jump to search

Ko betikäl gletik volapük pepakom in yels balid sibina okik. Vpans balid elogoms len datuv de Schleyer te genialikosi, nulikosi visü vpasits elsik negebik; ye no nog etuvoms dötiks patik. Ab ven ibeginon spodön vpo, gebön vpi in melak penädik e mudik, evedos klülik, das, äs datuv nonik, so i vp no pedatuvom foviko lefulik. Elabom döfis e defis, kels ejonomsok du geb e ekodedoms mobis e ployegis vemo mödik sis yels anik. Ye ceds e tikads dö menodam vpa ebinoms e binoms dilo nog so difik e sotimo sägo tapükik, das efeiton jünu dö veg e mod plagikün e gudikün, menodön vpi u jafön vapüki su plisips vpa e konsidü jonams, kels pegetoms me plak e vapükasits nulik evedöl pos vp. Vpans elso baladik eteiloms okis in palets difik, kels ekomipoms ta balvotik. Sukü atos lindif tefü vpamuf evedom bevü vpans; aniks edevoms leo vpi ezedoms binön vpans, votiks evedoms te lülogels, teldiks ezüpoms sägo vpasites votik, kels ejinoms gudikum omes ka vp, nen betikön, das vapük votik sembal kanom spelön nevelo, rivön i te paki volapüka obsik, pato bi num sitas somik vedom aigletikum, nen betikön, das zeil, kel palevipom fa vapükazüpels valik, parivom nevelo, if teilobs obis aiumo e steifobs rivön zeili tugedik, alik su veg votik.


E deno komip somik cedas jinom vemo natik! ibo vapük lefulik no kanom pajafön sunumo, ka jüs tikads peklüläloms boso. Anu kanobs labön speli, das tim at no binom fovo fagik. Ibo ya tikads enilomsok vemo e obaivögoms säto ba suno, al mekön mögik kovobami püdik e plöpik.


Ab feitöl dö menodam vpa efögeton leo pakami vpa, do binom stab vpa. Li vilobs valadön, jüs vapük gudikum lefulik pejafom? Vob at odulom luvelato nog yels mödik, ifi spidon ma mög. Vpapakam etakom in tops e klubs mödik du yels lätik. Ab tak binom gestep e binom pöligik plo vapükamuf lölik! Li vilobs valadön nu e beginön latumo komipi lölik denu plo pak? Mutos padotön vemo, va oplöpom täno, pato demü kosteifam vapükasitas votik, kelis dledön no binos zesüdik anu; ba obinos täno tu latik e töbs valik - vanlik. Nu volapük binom nog vapük pakikün, binom bevünetik. Ti men pekulivöl alik sevom vpi luüno segun nem, ab nog nolom nosi u te nemödo dö vapükasits votik. Klu tönobsös kelosi erivobs ya, e pakobsös volapüki de Schleyer i fovo to döfs e defs oma! Kanobs dunön atosi pluo, bi vp kanom pagebön as teda- e melakapük bevünetik, ifi no dalobs ba spelön, das ovedom jeno «el volapük». No vilobs migön obis in feit tikadas, sod gased obsik oblibom nepaletik e fiedik vpe nuik, äs pagebom fa vpans mödikün, - jüs bos lefulik tefü vapük pejafom. Ibo aimenodams, kels no nog binoms pedejötöl, e geb omas dämoms te e neletoms paki vpa.


Gased obsik binom peköseköl te pakame vpa. Pakam vpa binom glun vidikün, su kel mutobs i blüfön, rivön balami vpanas valik. Noganam fümik züpelas e flenas vpa mutom pavolekön me länaklubs e klub bevünetik, al tönön e konletön vpanis valik zi stän vpa. Ab nog demü kods votik veütik, pato al nindukön piano vpi in volamelak e rivön lensumami spet. gebami oma as tedapük, klubam somik mutom pavipön. Obinos klu sugiv obsik, seplänön e jonön atis, dat valiks lesevoms piano pöfüdis gletik, kelis klub bevünetik oblinom.


Ofödobs spodi me vp e oblüfobs, pladön omi nog umo in dün pakama vpa.


Ofödobs vpagasedis sibinöl as polelis e födelis döla vapükik e valiko vpaliteri, kel, äs jinos, pastümom e paliladom anu te nemödo, do labobs vobukis vemo mödik e bizugik fa vpans pesevikün e sikikün.


Binoms zeils gletik, kelis dasteifobs u vilobs yufön rivön. Ab kanoms parivön e porivoms piano, if vpans i votik valik no obinoms nedunik.




Se Volapük: Gased al pakam Volapüka 1894, Nüm: 1, Pads: 2-3.