Plattdeutsche Gedichte unterharzischen Dialects, humoristischen Inhalts/Twischen geboren un jung weren is en groter Underschid

From Wikisource
Jump to navigation Jump to search
<-- Kam man de Bäcker etwas spät, Hei wörr mit in dat Brodt e knät Plattdeutsche Gedichte unterharzischen Dialects, humoristischen Inhalts Is ok de Acker noch sau schlecht, den Dummen doch Kartuffeln drögt -->

In Trollbeck hat't seck taue dran,
Ne Frue is nach Kanter gahn,
Weil dei dat Kirchenbauk just harre,
Da bruke se nich na der Parre.
Se woll' en Döpeschien seck halen
Gebühren ok man half bietalen.
Wenn Kanters Döpeschien utstellt
Mein' sei, kregns man dat halwe Geld.
Sau wat kann aber doch nich sien,
Se nehmt et ja nicht vor seck in. —
De Kanter sä: Frau, hör Sie mal!
Weiß Sie wohl nicht die Jahreszahl
In welcher Sie geboren ist?
Dann find' ichs leicht in dieser List'.

De Frue kuckt den Kanter an
Un lachet alles wat se kann.
Herr Kanter sä se: Sei möt't wetten
Un het't gewiß noch nich vergetten,
Blot rike Lüe sind geboren
Tau andern Dingen uterkohren,
Na'n Armen werd nich hen e seihn,
Dei sind und bliwet immer klein.
De Armen maket keinen Prunk,
Werd' nich geboren — werd' blot jung.
Sei wet't, dat ek ok power bin,
Drum kann ek nich geboren sien,
Blot jung e worren bin eck man,
Sau mot't in Kirchenbauke stahn.
Eck wedde drop, dat Sei et find't
Dat Rike blot geboren sind,
Steiht't binnen nich, sau steiht et vorn,
De Armen sind man jung e worrn.