Plattdeutsche Gedichte/Twe Nester

From Wikisource
Jump to navigation Jump to search
<-- De Immen swarmt Plattdeutsche Gedichte En sękern Plack -->

Dat klingt so frisch den Garn hendœr,
So wunnerschön!
Un doch keen Vagel hin un hęr
Inn Busch to sehn.

Wo sitt de lütte Vagel man
Un hett sin Freid?
He kikt in't Nest sin Jungen an,
Hör wa he fleit!

Inn Garn dar is se nich to finn,
Un doch to hörn.
Wa klingt dat nüdli! se singt binn
Vœr unse Gœrn.

Un de hebbt Flünken alltomal,
De um ęr sitt,
Un ropt ut't lütte Nest hendal:
Papa, sing mit!