Pened hiela O. Serck gasede: Volapük (Hannover) 1

Nitedü pakam vpa egetobs penedi suköl. Begobs i spodelis obsik, dunön segun vip penela:

Söl redakel palestimöl!

In gased nitedik »Zi vol lölik« epuboms vöno laltügs difik: »Vp in dün: köda, literata, coga, nolügas difik e. l.« Dalolös obe jonön, liko kanobs mekön potamäkis, - kövis e konletamayegis votik, spetivo konletelis omas, dünelis vpa, spetivo pakama vpa.

Vpans gebomsöd plo spod rezipik, kövis potik difik, peflänöl me potamäks difik e konsefomsöd atis, nolöl, das obinoms med plo pakam vpa, if omogivoms omis, te pösodes edunöl büo bosi plo pakam vpa, u estudöl omi säto, al kanön lovepolön nen vödabuk tonabalienis 10 se vpagased nulikün, pegetöl fa label yega pevipöl.

Peböladob so mödo fa potamäkakonletels sudlanik, in vp jekik (sägo pebüköl fomü zülags, kelos givos garani nog nemödikum, das pösod tefik jäfom vpi). Konletels viloms sesugön (exploitieren) vpanis - jonobsöd omes, das no binobs fänels, sod mens plagik, flagöl koldünis, ifi no pösodik, so te födöl döli obsik; täno ostümoms obis, as manis plagik!

Jufü kövs penedas 2 pegetöl fa vpans eplöpob pos tim lonedik, dalöpön denu pesedelis 2 plo lesedam bevünetik vpa, yufü kels pösods 20 ponunoms denu dö sibin vpa, bevü kels glens anik ba otuvoms gluni flukik.

Binos pidik, das sit gudik at, medü kel i pósods, no kapälöl pöfüdi, keli vp ogivom menade, läpoloms al plöp döla obsik, no etuvom yufi valemik flanü vpans lánas idfik, bi eläpolomöv al gletam monamedas vpaklubas tefik, kels me dötums 45 pegevöl klubes, ekanomsöv bonedön vpaliterati lölik puböl - ye man paläsevom kösömo te, na pesepom.

Begob oli, debükön penedi at in gasedi divik ola, e spodelis oba, penön obe cedis okik dö nilud oba e dafulön begi oba tefü flänam spoda.

Atimo flagob ya de spodels oba, das bonedoms noe vpa gasedi valemik e Timapenädi, sod i Volaspodeli u Kosmopolani e nogani kluba Hannover, bi vipob spodön te ko vpans blöföl i vitimäli okik plo döl obsik.

D. O. D

Sanpeterburg, 1894 VIII. 13/25^id

Oscar Serck.

Se Volapük: Gased al pakam Volapüka 1894, Nüm: 6, Pads: 3-4.