Pened hiela L. Einstein gasede: Volapükabled Tälik 1

From Wikisource
Jump to navigation Jump to search

Volapük nu sibinom sis yels jöl. Begino ti nepesevik, bi peneklödöl deutels no äbinoms balidels al lensumön datuvi somik, do äs datuvs mödik, pemeköl fa man deutik. Nu efegoloms yels lul, siso ebeginob al studön vpi e lefoviko ilogob das binom med gudikün e nefikulikün al fetanön tikälo netis valik. Äbeginob lautön laltügis mödik dö vp. (lölo plu ka 200) belitöl omi äl lüods valik. Ye deutels äsäkoms obi: kisi mekön ko pük keli nek pükom in selän e no klödobs das flentels e nelijels u net sembal votik olensumom evelo püki somik. Tiemo plofed Kerckhoffs äpubom as vpel balid in Flent. Älesevob in om mani plo din at gletik e fikulik. Äpenob ome: Mütolöv balüdo dukön flentelis in fil, täno deutels osukoms omi. Pesagöl, pemeköl! Söl Kerckhoffs äbeginom me bevobam flentelas, konletöl zi ok menis veütikün kelis äkanom tuvön in Paris, dü estabob is in Nürnberg klubi balid gletikum Deuta. Ab Nürnbergels äbinoms neklödik e ästunoms vemo ven äliloms das parisels älensumoms datuvi deutik at. Lefoviko vp. äpakom oki in Flent lölik, älovegolom sägo Pyrenäis e Lapis e suno edagleipom i dänelis e lusänelis e netis votik. Nem söla Kerckhoffs äbinom in mud alima.

Nürnberg, 1887, 12ul 28id.


(Fov osukom)
L. EINSTEIN (vpo Balston).



Se Volapükabled Tälik 1888, Nüm: 1, Pad: 7.



(Fov) Tiemo äpoedob volapukahäti in Ped nürnbergik, ab ätuvob das in Deut änedobs mani gletikum de dinit niveraplofeda sembal, kel läbo äpubom nog büfü konsälem in München in pösod söla Kirchhoff plofed nivera in Halle. Äyulom pliseneles kongefa das vilom vobadön plo pakam vpa in Nolüdadeut jü bläd lätik oma. Vo vöd jönik se mud so keinik! Ya ebeginom velatön vödi at. Epükatom bletimo in Karlsruhe, in Hamburg plisenü pösods 1200, in Bremen, Magdeburg e zifs votik, so das nu tivävigo klubs nulik pastaboms in zifs mödik. Klubis mödikün nu labom Bayän, kö tidel Schmidt de Nürnberg estabom klubs in Schweinfurt e Bamberg; tidel Schlichtinger klubi in Amberg e opb it in Fürth ko tidel Schäfer klubi volapükaflens, kel labom ya kopanalis baltum. Fürth, lä Nürnberg, binom tedazif leveütik in Deut e balidno us älabob gälodi logön dilsumön gledilo yudelis al stud vpa, blöf gudikün plo diseinöf e pöfüdöf gletik datuva de Schleyer.

Nürnberg.
BALSTON.
(Fov osukom).



Se Volapükabled Tälik 1888, Nüm: 2, Pad: 15.



(Fov) Mütob nogna gekömön in tims balid vpa al nömodön vunasaneli Kniele, bi äbinom pakel balidün vpa in Würtemberg len flan datuvela. In mod otik loegobs tiemo in lefüd dl. Obhlidal, medinel in Meidling lä Wien, kel jünu epakom vpi in dils Löstäna. In München, kö ästebob in yel 1884 du hitatim e kö ämekob studis oba dö blüfs volapükik sis Leibnitz jü nu, ya ivobadom julatidel Gutensohn, kel ästudom vpi togo ko koblods anik e sukü pükat sembal ikodom plofedi Schnepper, kösekön oki vpe, e vo binom man nolelik e pükatelik, keli nedobs. No tumödo pasagos, das binom volapükavel klatikün e man nämikün in Deutän, keli mütobs labön as cifeli volapükelas deutik, if vilobs fälo vikodön visü fikuls, kels nog okömoms. Lesagob atosi, do no binom flen pösodik oba e do datuval no vilom lesevön omi; ab komü velat e konsidü san e benug dina gletik obas, kudadins pösodik aimütoms yilön. I ämekob us pesevügi nolela plivadik Stephanus, kel me laltügs nedänik in gased amsterdamik änindukom lesuno vpi in län at. Ye län so smalik no säto päkonsidön de tats gletik. Tö nütlid plofeda Kerckhoffs in Paris malom timagi nulik e flukik in jenav vpa äs ya ejonob in laltüg balid oba; no te spänels e tälels, kö söls Iparraguirre e Amoretti enindukoms vpi, ab i dänels, svedels, lusänels e. l. ästudoms glamati pebaliköl fa söl Kerckhoffs, so das suno i vödasbuk vpaflentik ävedom ned zesüdik netes at.

Nürnberg.
BALSTON.
(Fov osukom).


Se Volapükabled Tälik 1888, Nüm: 3, Pad: 23.



(Fov). Ye glegaseds deutik ainog äbedotoms binugi e seki vpa, jü plofed nivera Halle, söl Kirchhoff (Kerckhoffs deutik) äpladom oki len tip müfäla vpik, ibo sis tim at vp pastudom in zilek geilikün, lepato in Nolüdeut, kö ya sis yels mödik söl Fieweger in Breslau soaliko äkulivom vpi. I kongef de München no inedomöv de veüt sogletik, if plofed Kirchhoff no idugom-la omi. Dö yeg at openob in laltügs fäloik.


Jenavi kuladik vpa, tim latikum openom; is te äkanob givön sezükili en, sodas kotenik kanob finön numodi at ko noted, das atimilo mufäl vpik binom legletikün in Bayän, kö in muls tel lätik, klubs balsemäl nulik evedoms e kö nemödöf obik ibeginom bü yels lul vobön ko fikuls legletik; ibo nek ävilom klödön das kanapük valemo binom mögöf. Klu: dub ailendulam e ainäm ovikodobs i fälo, sikod lüvokob flenes valik obas: Ainefenikö! Aibivedö!

Nürnberg.



Se Volapükabled Tälik 1888, Nüm: 4, Pad: 32.