Pened hiela J. Henry Harrison
Dälolöd obe plänön flenes vpa in kolüms gaseda olik, gased ti lebalik, kel papübom nog in vp kapälnik, kodis setlida obik se kadem, nestü vob fefik e ladlik du yels mäl. Ozitätob gledinis, pebisiadöl fa ob in spod obik ko Dilekel Kadema, e oblefob omis. Säk binom —
Gepükob, 1do. — Ekoefob das, if olensumon plisipi Dilikela — gebi fomas petuvöl in glepüks yulopik mödikün — äs dukel lebalik, pük e glamat nulik, pedatiköl fa om, binoms lepötik e tikavik, ab no zepob, deno, vobön te al sükön püki nulik.
2do. — Pük nulik Dilekela, segun samad oma, pelägivöl in zülag 15id, jinom obe “pem selednik de püks latinik, spänik e tälänik, kel sümom dialegi pesevik jolas Zenomela e leigom boso pejinapüki (pigeon English) de Kanton.”
3do. — Vödem püka Dilekela miplidom obe: “vöds binoms lonedik, no benotonik, nedet<äl>ik e ofen böfik.”
4do. — Glamat nulik miplidom obe: “deklin e konyug, me bivöds pla posilabs, binoms plo ob votam misalöfik;” Schleyer plo sufafom lägivom te tonabi lebalik (p), e “konyug nulik flagom plo sufafom siti lölik cenamas e suamamas.”
Lulidno lätikno e lepatiko. — Iniludob das ebinob kopanal Kadema Bevünetik Volapüka, das esötob lefulnön bagafi balid statudas——
“Kadem jäfom te lefulami e menodami glamata e vödabuka Datuvela.” Kludo, no kanob blibön kopanal kadema al jafön väpüki sembal votik, no sägo lingu nov intranasionik! Pük at kanom binön nefikulikum ka vp al kapälön lilädölo, ab obinom egelo milna fikulikum al penön e pükön.
Läsiadob vödi bal, monedi oba lätik, ibo, pasuadöl das deil vpa obinom te tu sunik, klödob penön lätikno al gased vpk. Ployegs nulik e difik lömiboms ya nu valaflano, äs ezitos timü dilekelet de söl Kerckhoffs, kiüp, pos kongef bevünetik volapükelas, du Volasetopam de Paris, elabom döli neläbik mobön cenamis in vp. nezesüdik e nepofüdik. Egetob ya ployegis sümik, de kademal vönik vpa, söl Heintzeler, de Komitef Vpakluba de Hannover, e de Vpaklub de Königsberg. Benovipob Dilekeli ko kum böladamik mobas e ployegas, kel ofalom su bäk oma, e Kademi ko kofud e luleod nevitlik, kels osöloms domü om. Ob, omoslüpob se neföm at, e bliböl fiedik püke, kel ukanom vedön pükamed bevünetik lebalik, olüvob dämelis e sepelis volapüka, ab i venüdob lebegi bal e lätikün, das söls at no olaidunoms nemön kademi oksik dub calanem, petapüköl fa duns omsa valik — “Kadem Bevünetik Volapüka.”
Se Kosmopolan 1895, Nüm: 25, Pads: 252-253.