Pened hiela H. Guigues gasede: Volapükabled Tälik 3

Volapük in Flentän: Glefid yelsik volapükelas flentik ezitom äbalüdelo, düp 7^id vendela, in Grand-Hôtel, 12, Boulevard des Capucines, in Paris.

Pösods, läds e söls, plu ka 60 äbinoms plisenik.

Söl Lourdelet, bisiedel kluba obsik, eliladom depadis mödumik benovipas pesedöl al söl Kerckhoffs fa volapükels selänik; bisiedol obsik eliladom i sekusadapenedi dö möbin söla E. Gauthier, redakel de Petit Journal e slopel zilik volapüka. Söl Lourdelet epükatom lonediko dö pük valemik e dö okonsälem volapükelas in Paris. FIno edlinapetom al läds valik volapükik in Flentän e in selän.

Söl Dl. Allaire, kademal volapüka, edlinapetom al volapükaklubs 185 topik.

Söl Kerckhoffs, lepenädan obas dilsumälik, edlinapetom al kademalef. Eko pükat omik:

Läds e Söls,

  “Mobob dlinön al plöb kadema. Söl Schleyer elautom vobadi genialik; nem omik obinom nedeilik in jenabuk menada. Ab mans tum pekluböl binoms ofen nefägik mekön kelosi man letälik soalik edatikom. Vobs lemödik fenoms e detöboms lemaseli obsik; sikodo volapükels efünoms kademi bevünetik al finön e lefulnön vobadi oma.
  Pasuadob das binom fägik mekön vobi at.
  Dlinobsöd sikodo al plöb kadema”.

Läd Savary, jiredakel de Figaro, esagof venudiko vödis anik gönü volapük.

Söl Demôle edlinapetom al gasedels flentik e elenunom obes das ovisitom avigo dünali de selänadins al dunön lensumön volapüki as püki telegafik.

Fino, söl Roussey, tidel, edlinapetom al datuvel volapüka. Eko pükat omik:

Läds e Söls,

  “Dalolsös obe vüdön olis al dlinapetön al söl Schleyer.
  Dlinön al söl Schleyer, binos otüpo stimön noli, noli kel sevom miedis nonik, e kel binom pato tan kel baladom popis valik.
  Dü Yulop plifom dis vät de vafs destukik, senobs gälodi vemo gletik givön nami blodik mane kel evobom, du yels tels, al lelön stumi de püd e de plöb, no te plo fatän omik, ab i plo menad lölik.
  Sikodo, läds e söls, dlinobsös al Cifal de Konstanz e al mostep de vobad omik”.

Pükats at valik peläsevoms levemo.

Bisiedel obsik elenunom i obes das klub kaenalöfik in Paris desänom ninsädön tidüpi volapüka in plogam omik.

Zäl obsik flentik pejötom len zeneit.

Flentän no latom; tidom sami e vitimama; vilom dunön levikodön vobadi söla Schleyer. If nets valik yufoms e posdunoms obis, sponobs füdeti volapüka.

Paris, 1888 1^ul, 25^id.

GUIGUES.

Se Volapükabled Tälik 1888, Nüm: 2, Pads: 14-15.