Pened hiela A. de Jong söle: G. Ljusterdal 3

From Wikisource
Jump to navigation Jump to search

DR. ARIE DE JONG
PRESIDAN VOLAPÜKAKLUBA VALEMIK NEDÄNIK
SEKRETAN KADÄMA VOLAPÜKA


Nüm: 17.

‚Leiden‛ 1951 febul 17.



O söl lestümik!


Binos pidabik, das buks fa ol pebonedöls no nog ekömons. Penolös obe nemi e ladeti bukatedana, lä kel ebonedol bukis et! If sevob onis, obegob fiame: ‚Brill‛ ad sedön suniko bukis et.


Vestigolös va Vödabuk e Gramat Volapüka no dabinons in bukem nivera di ‚Uppsala‛! Buks bofik pelegivons bukemes mödik, ab klüliko no bukemes valik vola.

Suäms dinas, kelis epotob ole binons:

Gramatil Svedänapükik     fl. Ned. 0,20
‚Lehrbuch‛ fa ‚Johann Schmidt‛ 0,80
Volapükamäks 100 0,50

Säkol, va literat Volapükik dabinon. Liedo mutob gespikön: no nog in Vp. perevidöl. Ab kanol tuvön yegedis mödik in yelods büikum Volapükagaseda. Suäm yeloda büikum gaseda at binon: fl. Ned. 1,50 a yelod. If vilol, kanob sedön ole onis ud anis onas.


Tefü pel no nedol kudön. Sevob, das ün atim no kanoy sedön moni. Klu kanol pelön latikumo uti, keli debol, if sed mona obinon dönu mögik.


Lä at läükob kapiti: 13 peneda balid ela ‚Paulus‛ elanes di ‚Kórinthos‛. Ba penädil at onitedon oli.


Ko glid flenöfik,

olikan:


Arie de Jong.



Vödem rigädik, neai pepüböl.