sibinami volapüka, esludom, lensumön kipami nepaletik e dunön poso äs büo valikosi, al födön volapüki me dunöf nämik e plagik. Osteifom, al gedagetön plo volapük gluni, keli jiniko ebölüdom; sagob jiniko, ibo döl so nobik püka bevünetik, egetöl ya vulis so dibik, jeno no kanom, panosön, patiko if mans so digik e fefik, äs uts, ebinöl plisenik in lasam kilid volapükakluba nolümelopik, kovoboms plo at. Ab töbams volapükakluba nolümelopik, lio vobädik e sikik binomsöv, deno no sätoms al dagetön zeili; volapükaklubs valik tala, vo volapükan alik mutom kovobön, al volekön döli nobik. Step veütikün alos binom balif väflanik bevü volapükans, e klu suflagobs volapükanis valik, gebön fluni omas, das venudlöf rübik at bevü palets pofinom; suflagobs valikis, lenlägon döli leveütik e no lüvön ati löliko demü difs smalnik. Okapälobs balim votimi, ufas penobs stüli balid, udas gebobs stüli telid u kilid; valiks nens no kanoms binön klatels äs I no valiks penoms klatiko lomapüki omas; sikodo sepükobsöd tikis obas balugiko, baligo e klüliko, sodas alim kanom kapälön atis, — tim omekom madik lifafägikosi, du puodikos e nezesüdikos defalos ito.
Ibo no kanos padotön, das döl gletik püka bevünetik melitom slopäli leladik e töpis nefenis züpelas oma, ni kanos panonön, das volapük soelik bevü bluffs valik püka bevünetik pladalom e kopom jeno döli at e demü pakam gletik ya edagetöl e demü mökods votik ya sätiko peseplänöl e peläsevöl.
Konsidü stad at uf mutobs sefön kelosi ya labobs, ud oböludobs valikosi; uf volapük vedom pük bevünetik, ud döl balöna menadi me tan püdik püka valemik pabölüdom löliko; e If jötobs volapüki, lätikos ozitos zelado, ibo no blüf votaflanik kanom spelön, dagetön seki somik äs volapük, nestü difs bevü züpels oma.
Kludo möfö vafis! E komipobsöd pebalöl te ta flens tugedik döla, ta nenolug e ta lindif.
Volapükaklub nolümelopik ekomitom obi, redakön bledi at calik oma ma lenlogedam löpnik, e osteifob dafulön valädamis e vipamis kluba. Sibinam materik bleda at soin pesefom, das büo kanom pubön in fom at; if nited plo volapük oglofom denu, sodas num lilädelas e bonedelas pamödom, num flanas bleda at I pomödom dinädamafiko. Spelob, das volapükan alik odilsumom in steifs obas gonü födam döla volapükik, e das oyufom obi, al mekön bledi nepaletik at nuneli fiedik velatikosa, gudikosa e jönikosa.
E nu nog begob volopükanis de nil e fag, das lenlogoms bledi at as fleni gudik, me kel kanoms sepükön tikis e niludotis omas tefü valikos födöl e mödöl nitedi plo säks volapüka, e uti plo literat, nolav, ted e dustod. — Vekömö! SAMUEL HUEBSCH.
