Idi adda iti lansanganen, ni Basilio pinanunutna no ania ti mabalin na nga aramiden ingga na iti dumteng daydi dakes a uras; maikapito nga liras pay laeng. Bakasion idi, ket amin dagiti agad-adal addada kadagiti il-ili da. Ni laeng Isagani ti nadi a nagawid, ngem nanipod pay iti bigat, nagpukawen, ket saan nga ammo ti yan na. Kasta ti inbaga da ken Basilio idi napanna kinita daydi gayyem na apaman a nakaruar iti pagbaludan, ta inna kuma dawaten a pasangbayenna. Ni Basilio saan na nga ammo no adino ti papanan na, awan pirak na, awan adda kenkuana no di la daydi rebolber. Daydi pagsaingan iso ti malaglagip na, iti uneg ti dua nga uras agbettakto ti naindaklan a kibaltang, ket, idi ta inna pinanunot, inpagarupna no dagiti tattao nga inna makita a lumabas magmagnada nga awan ulo dan; rimmagsak iti naranggas idi makunana iti bagi na nga idinto a, sibibisin ken siririgat, iti daydi a rabii agbalin a nakabutbuteng, a idinto a maysa la nga agad-adal a napanglaw ken paub-ubing, nalabit ti init innanto malgakan a nakakigkigtot ken nakaap-aprang, sitatakder iti rabaw dagiti binunton a bangbangkay, agituytuyang kadagiti linlinteg a inda tungpalen amin dagiti lumabas idi iti saklangna a sisasakay kadagiti nakasaysayaat a luglugan da. Nagkatawa a kasla maysa a nagunggan, ket inarikapna ti putan ti rebolber na; dagiti balbala addada iti bulsa na.
Adda nalagipna a sinaludsod: ¿adinunto ti pangrugyan daydi nga aramid? Iti pannakaulaw na, saan na a nalagip a sinaludsod ken Simoun, ngem ni Simoun inna kinuna ken kuana nga adaywanna ti lansangan nga Anloague.
Iso di immatap; iti daydi a malem, idi nakaruar iti pagbaludan, napan iti daydi daan a balay ni Kapitan Tiago, ta inna sinapol dagidi sagbabassit a kukkukua na, ket nasarakanna metten a namalbaliw ken sisasagana a pagdayaan; agasawa ngamin ni Juanito Pelaez! Ni Simoun adda nasauna a rambak.
Idi, isuna a nakitana a limmabas iti sango na ti atiddag a intar dagiti luglugan, napunno kadagiti babaknang ken dudunia nga agsasao iti nabiag; kasna nailasin iti uneg da
