Ti kadaklan ti Pansiteria Makanista de Buen Gusto naipadpaduma ti buya na iti daydi a rabii.
Sangapulo ket uppat a babbaro a naggapgapo kadagiti kangrunaan a purpuro ti Pilipinas, manipod iti indio a darisay, awan lalaok na (no kasta ta adda pay) inggana iti kastila a nayanak sadi Espania, natiptipunda ta inda aramiden ti inpatigmaan ni Padre Irene a panagdadayada, a pangrambakda iti naikeddeng a banag ti dawat da a pannakaisuro kuma ti sao ti kastila. Inupaanda amin a lamlamisaan, pinanayunanda dagiti silsilaw ket pinaipagketda iti diding, iti abay dagiti es-estampa ti insik, toy naipadpaduma a sinurat:
!DAYAW TI IDATON KEN CUSTODIO GAPO ITI KINALAING NA KET PANSIT DITOY DAGA KA DA GITI AGTUTUBO A NAIMBAG TI PANAGNAKNAKEM DA!
Iti maysa nga ili nga amin a nakakatkatawa maabbungan ti naranga, nga ado ti ngumato gapo laeng iti bileg ti asok ken angin a napapudot; iti maysa nga ili a pakaaramidan na a ti kararangaan ken kalalawagan a banag makaparanggas no rumuar iti puso ket mabalin a mamataod iti kibor, nalabit iso daydi ti kasayaatan a pangrambak iti daydi pataod ti ulo ingget laing a don Custodio. Dagiti inda nagangangawan sungbatanda iti maysa a pagaak ti nakirmet a inda kadakuada inpaay; ti pastel ti Turay subalitanda iti sangapinggan a pansit, ket ado pay ket unayen!
Agkakatawada, aggaangawda, ngem inadlaw a ti ragsak da mapilpilit; dagiti katkatawa da inamigergerda a kasla mabuteng, kadagiti matmata da adda agruar a napardas a rissik ket saan a maymaysa ti nakita a nakalua. Ket nupay kasta, dagidi nga agtutubo naranggas da, saan da a nalinteg! Saan la nga idi ti umuna a kasdi ti binanag dagiti kasayaatan a panpanunot, a malpay ti inanama gapo kadagiti ado a sasao ken bassit nga aramid: saan la a ni don Custodio ti kasdi, aduda, aduda unay dagiti immun-una ngem isol
