ⲥⲩⲛⲑⲉⲟⲩ.
ϯⲙⲁⲣⲧⲩⲣⲓⲁ ⲛ̀ⲧⲉ ⲡⲓⲁ̀ⲅⲓⲟⲥ ⲅⲉⲱⲣⲅⲓⲟⲥ ⲡⲓϫⲱⲣⲓ ⲙ̀ⲙⲁⲣⲧⲩⲣⲟⲥ ⲛ̀ⲧⲉ ⲡⲉⲛⲟ̅ⲥ̅ ⲓ̅ⲏ̅ⲥ̅ ⲡⲭ︦ⲥ̅
ⲉ̀ⲧⲁϥϫⲱⲕ ⲙ̀ⲡⲉϥⲁ̀ⲅⲱⲛ ⲉ̀ⲃⲟⲗ ⲛ̀ⲥⲟⲩ ⲕ̅ⲅ̅ ⲙ̀ⲡⲓⲁ̀ⲃⲟⲧ ⲫⲁⲣⲙⲟⲩⲑⲓ
ϧⲉⲛ ⲟⲩϩⲓⲣⲏⲛⲏ ⲛ̀ⲧⲉ ⲫϯ
ⲁ̀ⲙⲏⲛ.
ⲛ̀ϩⲣⲏⲓ ⲇⲉ ϧⲉⲛ ⲡⲓⲥⲏⲟⲩ ⲉ̀ⲧⲉⲙⲙⲁⲩ.
ⲙ̅ⲡⲥⲏⲟⲩ ⲙ̀ⲡⲓⲭⲓⲙⲱⲛ ⲛⲉⲙ ⲡⲓⲛⲓϣϯ ⲛ̀ϯⲱⲅⲙⲟⲥ ⲉ̀ⲧⲁϥⲧⲱⲛϥ ϩⲓϫⲉⲛ ϯⲉⲕⲕⲗⲏⲥⲓⲁ̀.
ⲛⲁϥϣⲟⲡ ⲡⲉ ⲛ̀ϫⲉ ⲟⲩⲛⲓϣϯ ⲛ̀ϫⲟⲥⲉⲙ ⲉϥⲛⲁϣⲧ.
ⲛⲓⲟⲩⲣⲱⲟⲩ ⲇⲉ ⲕⲁⲧⲁ ⲙⲁ ⲛⲁⲩⲥⲱⲣⲉⲙ ⲡⲉ.
ⲉⲩϩⲱⲗⲉⲙ ⲛ̀ⲥⲁ ⲛⲓⲣⲉϥϩⲓϣⲉⲛⲛⲟⲩϥⲓ ⲛ̀ⲧⲉ ϯⲙⲉⲑⲙⲏⲓ ϧⲁⲣⲁⲧⲟⲩ ⲛ̀ⲛⲓϣⲏⲟⲩⲓ̀ ⲛ̀ⲧⲉ ⲛⲓⲓ̀ⲇⲱⲗⲟⲛ ⲛⲁⲩⲉⲣⲁ̀ⲛⲁⲅⲕⲁⲍⲓⲛ ⲛ̀ⲟⲩⲟⲛ ⲛⲓⲃⲉⲛ ϫⲉ ⲛ̀ⲧⲟⲩⲉⲣ ϣⲟⲩϣⲱⲟⲩϣⲓ ⲛ̀ⲛⲓ̀ⲁⲱⲗⲟⲛ ⲛ̀ⲧⲉ ⲛⲓⲇⲉⲙⲱⲛ.
ⲁϥϩⲓⲧⲟⲧϥ ⲟⲩⲛ ⲛ̀ϫⲉ ⲡⲟⲩⲣⲟ ⲇⲁⲇⲓⲁ̀ⲛⲟⲥ ⲫⲏⲉ̀ⲧⲁϥϭⲓ ⲙ̀ⲡⲓⲉⲣϣⲓϣⲓ ⲉⲁϥⲁⲙⲟⲛⲓ ⲙ̀ⲡⲓⲇ︦ ⲛ̀ⲗⲁⲕϩ ⲛ̀ⲧⲉ ⲡⲕⲁϩⲓ.
ⲉ̀ⲧⲁϥⲉⲣϣⲟⲣⲡ ⲛ̀ϫⲉ ⲡⲟⲩⲣⲟ ⲇⲁⲇⲓⲁ̀ⲛⲟⲥ ⲁϥϩⲉⲙⲥⲓ ϩⲓϫⲉⲛ ⲡⲓⲃⲏⲙⲁ ⲁϥⲥϧⲁⲓ ⲛ̀ϩⲁⲛⲡⲣⲟⲥⲧⲟⲅⲙⲁ ϫⲉ ϩⲓⲛⲁ ⲛ̀ⲥⲉⲱϣ ⲙ̀ⲙⲱⲟⲩ ϧⲉⲛ ⲡⲓⲕⲟⲥⲙⲟⲥ ⲧⲏⲣϥ.
ⲛⲁⲓ ⲛⲉ ⲛⲏⲉ̀ⲧⲥϧⲏⲟⲩⲧ ⲛ̀ϧⲏⲧⲟⲩ.
ϫⲉ ⲉ̀ⲡⲓⲇⲏ ⲁ̀ ⲟⲩⲥⲙⲏ ⲓ̀ ⲉ̀ⲛⲁⲙⲁϣϫ ϫⲉ ⲫⲏⲉ̀ⲧ ⲁ ⲙⲁⲣⲓⲁ̀ ⲙⲁⲥϥ. ⲛ̀ⲑⲟϥ ⲙ̀ⲙⲁⲩⲁⲧϥ ⲡⲉⲧⲟⲩⲟⲩⲱϣⲧ ⲙ̀ⲙⲟϥ ⲡⲉ.
ⲟⲩⲟϩ ⲡⲓⲁ̀ⲡⲟⲗⲗⲱⲛ ⲛⲉⲙ ⲡⲟⲥⲓⲧⲱⲛ ⲛⲉⲙ ⲡⲓⲉⲣⲙⲏⲥ ⲛⲉⲙ ϯⲁⲥⲧⲁⲣⲧⲏ ⲛⲉⲙ ⲡⲓⲍⲉⲩⲥ ⲛⲉⲙ ⲉ̀ⲍⲁⲃⲉⲗ ⲛⲉⲙ ⲱⲣⲛⲁⲥ ⲛⲉⲙ ⲥⲕⲁⲙⲁⲛⲇⲣⲟⲛ ⲛⲉⲙ ⲡⲥⲱϫⲡ ⲛ̀ⲛⲓⲛⲟⲩϯ ⲥⲉⲟⲩⲱϣⲧ ⲙ̀ⲙⲱⲟⲩ ⲁⲛ.
ⲁⲗⲗⲁ
