— 22 —
DADITE (avou on sospir)
Avez vs cåzu fini do pretchî !
POREA
O ! dji sés bén k’ dji n’ wangnrè rin. C’ est tot côp d’ såbe ès l’ aiwe. Li pleu est pris, c’ est di m’ fåte, et l’ åbe må tourné est trop vî po måy si rdressî.
DADITE
Est ç’ li bea Gårnir ki vs a consyî di m’ fé ’ne sinne insi ? Cwand i vénrè co cial, dji lyi mosterrè l’ ouxh, ci-la ! (aporçuvant ki Porea n’ overe pus) Kimint don, el leyîz vs ouve ? Avez vs fini vos escôsswesses ?
POREA
Awè dj’ a fini ; n’ est i nén tins, po on semdi al nute ?
DADITE
Et bén, i n’ a nou må, dji va poleur on pô rnetyî. Avou les omes avå l’ måjhone on n’ pout rén fé d’ bon. (loucant al tere) Loukîz l’ bea Gårnir k’ a vnou taper les cindes di s’ pupe tot costé.
POREA
Dji m’ va ’ne gote rinetyî, savez.
DADITE (alant viè l’ årmå)
Awè, alez.
POREA (alant viè l’ poite di droete)
A dj’ dju on prôpe sårot ?
DADITE
Awè. E l’ årmå sol deujhinme plantche. Dji vén del ristinde.
