COMRAC FIR DIAID ⁊ CONCULAIND SO.
Is andsin rohimrāided leōsom iarum cia fer bad tūalaing dingbāil Conculaind dīb. Adbertsadar ⁊ ronertsadar ⁊ ronaidsetar ceithri cōicid hĒrenn cia[1] bad chōir do thabairt for āth inn aigid Conculaind. Atrubartadar uili corb ē in Congenchnesach a hIrrus Domnand,[2] in feidm nāch fuiliṅgther[3] ⁊ in bairind lecc brātha, a derbchomalta dil dīchra fodeisin. Ni bāi ic[4] Coinc[h]ulaind cles nā beth aice, acht mad in gāi bulgai nammā, ⁊ cid indar leōsom bāi aiciseom a sechna ⁊ a imdegail fair dāig coṅgnaidhi[5] imbi, noconisgebdis airm na ilfǣbair. Dobretha Medb techta for cend Fir Diad. Nocho tānic Fer Diad risna techtaib hīsin.
Dobretha Medb filid ⁊ ǣs dāna ⁊ ǣs glāmtha grūaidi ara chend, co nderntais a ǣrad ⁊ a aithised 7 a ainfīalad, conā fāgad inad a chind for bith, co tīsad i pupall Medba ⁊ Aililla for Tāna. Tāinic Fer Diad leisna techtaib hīsin ūamun[6] a imderctha dōib. Tucad Findabair ingen Medba ⁊ Ailella fora. leathlāim; isī [Ḟ]indabair[7] sin nogobad lāim ar cach cūach ⁊ ar cach[8] copān d'Fir Diad; isī nobeired teōra pōc[a] fria cach copān dībsin dō; isī nodāiled ubla fīrchubra dar sedlach a lēned fair; ised adberead sī, ba [35b] hē a leandān ⁊ a toga tochmairc do feraib int sægail[9] Fer Diad. Inaim robo sāithech subach sofarbāili[10] Fer Diad, is and adbert Medb: "Maith aile, a Ḟir Diad, in fetairseo cia fāth maradgoired isin pupullsa?" "Nād edarsa ōn ōm," ar Fer Diad, "acht degmaithi fer nErind and; cid ēcōru mo beithse and anās cach deglǣch?" "Nād ed ōn ām," or Medb, "acht da thobairt charpait tri secht cumal dait ⁊ timthacht dā fer dēac ⁊ cutruma Maigi Murthemne do min Moigi Aii ⁊ bith a Crūachain dogrēs ⁊ fīn do dāil fort and; sāiri do chlaindi ⁊ do cheniūil dogrēs can ch³ain cen chobach; mo duileanddealc ōirsea duit, i failet deich fichit uṅga ⁊ deich fichit leathuṅga ⁊ deich fichit crosach ⁊ deich fichit cethramthan[11]; Findabair m'ingensa ⁊ ingen Aililla do ōenmnāi dait, ⁊ comaid dom slīasaidsea, dia rīs a leas
- ↑ The first letter looks like o
- ↑ a later below the line
- ↑ Beneath l has been added later a'
- ↑ c added below the following c
- ↑ The mark of aspiration is later
- ↑ leg. ar ūamun
- ↑ Beneath indabair has been added later find
- ↑ The first letter seems to be c altered to g
- ↑ The s has been added later over the preceding t
- ↑ f added above
- ↑ The mark of aspiration is later
