Page:Tain Bo Cuailnge.djvu/81

From Wikisource
Jump to navigation Jump to search
This page has been proofread.
69
TÁIN BÓ CÚAILNGE

Is andso rogab in caur ⁊ in cathmílid ⁊ int indell chró bodba fer talman, Cūchulaind mac Sūaltaim, rogab[1] a chatherred catha ⁊ c[h]omraic ⁊ c[h]omlaind. Bá don c[h]atherred c[h]athasin ⁊ chomraic ⁊ chomlaind: rogabsom immi secht cneslesti[2] fichet cíartha clártha comdlúta, bítís bá thētaib ⁊ rothaib ⁊ refedaib hi cústul fri gelc[h]nes dó, arnāchandec[h]rad a chond nāch a chīall ō doficed a lúth lāthair. Rogabastár a chathcriss curad taris anechtair do chotutlethar c[h]rūaid choirtchide do formnsi secht ndamseched ndartada, congabad dó ō thana a tháib co tiug a ochsaille; robíth immi ic díchur gāi ⁊ rend ⁊ err ⁊ slegh ⁊ saiget. Dáig is cumma. focherditís de ⁊ mar bad do chloich charraic c[h]ongna rochíulaitís. Is andsin rogabastár a úathroic srebnaide srōill cona cimais do bānór bricc fria fri mōethīchtur a medóin. Roga[79b]bastár a dondúathróic ndondlethair ndegsúata do formna cethri ndamseched ndartada cona chathchris do cholomnaib ferb fua dara fúathróic srebnaide srōill sechtair. Is andso rogabastár in rígnia a chatharm catha ⁊ c[h]omraic ⁊ c[h]omlaind. Ba don chatharm chathasin íarom: rogabastar a ocht claidbīni ima arm dét ndrechsolus, rogabastar a ocht slegīni ima sleig cóicrind ⁊ a saigetbolg, rogabastar a ocht ngothnatha má goth néit, rogabastar a ocht cletíni ma deil cliss, rogabastar a ocht scíathu cliss imma chromscíath ndubderg, ina téged torc taiselbtha ina tul tárla cona bil áithgéir ailtnidi imgéir ina hurt[h]imchull, co tescfad finna i naigid srotha ar āthi ⁊ ailtnidecht ⁊ imgēri; inbaid fogníth inṅd ōclāig fǽborchless dī, is cumma imthescad dá scíath ⁊ dá sleg ⁊ dá chlaideb. Is andso rogab a chírchathbarr catha ⁊ c[h]omraic ⁊ c[h]omlaind ima chend, asa ngaired gāir chét nōclach do sírégem cecha cúli ⁊ cecha cerna de, dāig is cumma congairtis de bánánaig ⁊ boccánaig ⁊ geniti glinne ⁊ demna aeóir ríam ⁊ úaso ⁊ ina imt[h]imchiull cach ed notéged re testin fola na mmíled ⁊ na nananglond[3] sechtair. Rochress a c[h]eltar c[h]omga taris don tlachtdillat tíre tair[n]gire dobretha ō aiti druidechta.

Is andso cétríastartha im Choinculaind, co nderna. úathbásách nilrechtach ningantach nanaichnid de. Crithnaigset a charíní imbi imar c[h]rand re sruth imar bocsimin fri sruth cach mball ⁊ cach nalt ⁊ cach nind ⁊ cach náge de mulluch co talmain. Rolæ

  1. om.
  2. leg. cneslénti
  3. leg. na nanglond