Page:Tain Bo Cuailnge.djvu/20

From Wikisource
Jump to navigation Jump to search
This page has been validated.
8
TÁIN BÓ CÚAILNGE

láim aili do Ailill; Findabair ingen Ailella ⁊ Medbi fora lāimsidi; Flidaisi[1] fora láimsidi. Cenmothá fossu ⁊ timthirthidi insin.

Tic Medb iar ndēscin int slóig ⁊ asbert ba nespa do chách dul int slógaid díantēset in tricha cét Galión. “Ced ara tānsi na firu?” or Ailill. “Nidátánsem dam,” ol Medb, “it āna ind óic. Intan rombói cách oc gním a sosta, roscáig dóibseom tuga a sosta ⁊ fune a mbíd. Intan romboí cách oc praind, roscáig praind dóibseom hi suidiu ⁊ robátár a cruti ocaó nairfitiud. Is espa[2] didiu,” ol Medb, “a techt; is foraib biáid búaid int slóig.” “Is airiund arbáget dano,” or Ailill. “Ní regat lend,” ol Medb. “Anat didiu,” ol Ailill. “Náchainfet dano,” ol Medb. “Ficfit ford[3] iar tíachtain,” olsi, “⁊ gébtáit ar tír frind.” “Ceist. Cid dogéntar friú,” or Ailill, “innách maith a nanad nāch a techt?” “A nguin,” ol Medb. “Ní chélam as banchomarle,” or Ailill; “ní maith a nasbir.” “La sanais ón,” ol Fergus, “nímaricfe, úair is ǽs comchotaig[4] dúinni nar nUltaib, acht ma nongontar uli.” “Cid ed ón dorigenmais[5]ní,” ol Medb. “Ár atúsa sund mo sainteglach díb tríchtaib cét,” olsi, “⁊ atát na .vii. Mane .i. mo secht maicc, .vii. trichait chét; cotarói a toccad,” olsi, “.i. Mane Māthramail ⁊ Mane Athramail ⁊ Mane Morgor ⁊ Mane Mingor ⁊ Mane Mōepirt (.i. iss ēside Mani Milscothach), Mane Andóe ⁊ Mane Cotageib Ule; is ēside tuc cruth a máthar ⁊ a athar ⁊ a nordan diblínaib.” “Nīpá fír són,” ol Fergus; “atát .vii. ríg sund din Mumu ⁊ tricha cét la cech næ, comchotach dúinni nar nUltaib. Dobérsa cath duit,” ol Fergus, “for lár in dúnaid hitām cosna .vii. trichtaib cétsin ⁊ com thrichait chét fadéin ⁊ co trichait chét na nGalión. Acht ní thacērsa anísin,” ol Fergus; “arlifimni na hócu chena connágébat forsint slóg. Secht trichait [57a] cét dēac lenni,” ol Fergus, “iss é lín ar ndúnaid cenmothá ar ndǣscorslúag ⁊ ar mná—ar itá a rīgan la cach ríg sund hi comaitecht Medba—⁊ cenmothá ar maccǽmu. Issē int ocht(mad) tricha chét déac inso .i. tricha cét na nGalión. Fodailtern slóg ule.” “Cumma lem,” ol Medb, “acht nā robat isin chāir chomraic itaat.” Is ed dognīth and iarum, fodāilte in Galióin fón slóg.

Dollotár ass arnabárach do Móin Chóiltrae. Dosnárthet ocht fichit oss nallaid and i nóen alaim. Cúartait impu; nosgonat íarom. Nách airm thra imbúi fer donaib Galiōnaib, is hé ar-

  1. Added over line; leg. Flidais
  2. Gl. .i. is feles
  3. = forn
  4. com over the line
  5. Gl. .i. rofetfaimmais a denom