Bhoenten," saotta Ali, ladjhoe ngotja' polè: "Kartoe pos panèka abdhi dhǎlem ollè kèrèman dări sapopo dhălem."
"Apa sapopona djărèja ako-bengko è Ngadiwono?" Bhoenten, sapopo dhălem asakola pardjadji è Pro- bolinggo, nangèng ampon onèng èntar da' ghoenong Bromo."
"O, bǎrijă; dhǎddhi sè mellè kartoe pos rèja èangghoej perèngettan, ladjhoe èkèrèmmaghi da' ba'na. Sèngko' ijǎ la tao Ngadiwono rèja, kennengnganna è bără dădjăna ghoenong Bromo, mongghing è pèngghirra lorong dări ghoenong djărèja da' Pasoeroean. Orèngnga dhisa djǎrèja orèng Tengger."
Bhoeroe napa sabarija sè atjarèta pas bădă morèd atanja: "Ponapa orèng Tengger panèka èngghi bhǎngsa Djhăbă?"
"Ija, nangèng bănnja' bhidhăna ban orèng Djhăbă otabǎ Madhoeră è la'dinna', sarta bånnè orèng Islam."
"Ponapa aghamana ?" otja'na Kasmidi; molana bangal atanja, sabab ghoeroena lèboer bhai mon bădă morèddhă anja-tanja.
"Parkara aghamana ta' pang-ghămpang ba'na ngartè, tapè sèngko' ngartè'aghia nè'-sakonè', sopadja ba'na ollea atambă pangartèan. Ghi' djhaman kona nalèkana orèng Djhăbă ghi' ta' tao ka aghama Islam, aghamana aghăma Hindoe. Nalèka djárèja bădă orèng sè njarè kennengngan è tana paghoenongan; bhäreng nemmo sè mapan, ijă arèja è ghoenong Tengger, ladjhoe ako-bengko è djădija, sarta pas ènjamaè orèng Tengger.
Nalèka orèng Djhăbă laènna maso' aghama Islam, orèng Tengger ta' ghellem noro', nepteppè aghamana sè kona; molana kongsè satèja è dhisana orèng Tengger taḍă' masèghiddha, tadǎ' langghǎrră."
Ali sè ngèḍingngaghi tjarètana ghoeroena tjè' ongghoena.
