13. Ettè.
(Sambhoenganna bhab 12).
Samarèna manḍoér Kertè atjarèta ḍă'barija orèng kaempa djărèja ladjhoe adjhălăn terros, nangalè dăoenna ettè ngalarkar è tana. E djăḍijă bănnja' koli binè' paḍă nolong dăoenna ettè djǎrèja èbăddhai ghaddhang, pas èghibă ka messin pangghilisan, ijă arèja sèttong messin ngangghoej băto doewa mègghi' tompang tèndhi paḍă apèddhel. Dăoenna ettè ghella' èghilis è djadijă.
Ghi' lamba'na ghilisan djărèja èpadjhalan băn orèng; ella tanto pangghăbăjăn tjara djarèja abit ghalloe, molana pas èghantè'è ngangghoej messin. Kalamon ella seddheng paghilissa, dăoenna ettè djărèja èampar pas èpèlè, sè sar-kasar èpapolong paḍă kasarra, sè lembhoe' paḍă lembhoe'na.
Saha ban Achmad ngala' ḍăoenna ettè djǎrèja pas ètjèjom, tapè ta' abăoe ettè, molana ladjhoe ngotja': "Ma' ta' abăoe ettè ?"
