522NOLI ME TÁNGERE
Ang banwa nagtulog sa silak sang bulan. Si Crisóstomo bumangon sa pagdayaw sang kalinong sang kinaugalì. Ang subâ makitid kag sa iya mga pangpang naghumlad ang wayang, nga natamnan sing kumpay.
Binasya ni Elías ang iya lulan sa pangpang, nagkuhà siá sing isá ka malabà nga kawayan kag kinuhà niya sa idalum sang hilamón ang pilá ka waáy unód nga mga bayùong ukón mga sako, nga nahimò sa dahon sang burí. Pinadayon nila ang pagpalakát sang baroto.
—Ikaw ang tag-iya sang imo kabubut-on, ginùo, kag sang imo palaabuton, — silíng niya kay Crisóstomo nga naghipos gihapon. Apang kon ipahanugot mo sa akon ang paghambal, isilíng ko sa imo: Tan-awá sing maayo ang imo pagahimùon, ikaw ang mapasidlab sang inaway, may kwarta ka, ulo, kag makakità ka gilayón sing madamò nga butkon, sanglit madamò ang nagapangalisód. Labot pa, sa siní nga inaway nga imo tukuron, ang magabatás sing labí amó ang mga indi makapanagáng kag mga wala'y salâ. Amó man nga mga balatyagon nga sang isá ka bulan nga nagligad, nagtulód sa akon sa pagpalapít sa imo sa pagpangayô sang mga pagpanibag-o, amó man karón ang nagatulód sa akon sa paghambal sa imo nga hunâhonàon mo. Ang pungsod, ginùo, walâ paghunâhonà nga magbulág sa Ilóy nga Pungsod; walâ pagpangayo kundi diutay lamang nga kaluwasan, hustisya kag gugma. Pagabuligan ka sang mga nagakalisód, mga kriminal, mga nadulàan sing paglaum, apang ang banwa indì maghilabót. Masayóp ka kon, makità mo nga ang tanan madulóm, mapati ka nga ang pungsod walâ na sing paglaum. Ang pungsod nagaantos, hùo, apang nagahulat gihapon, nagapati, kag maribók lamang kon nadulaan na sing pagpaumod, iní, kon inâ ang luyag sang mga nagagahúm, nga sa karón malayô pa. Akó man indi magbuylog sa imo; indì gid akó magdangóp sa sinang' katapusan nga mga kalalangan samtang ginatan-aw ko nga may paglaum ang mga tawo.
—Hanti malakát akó nga walê ka! — Sabát ni Crisostomo
nga may pamat-od.
______________
sa ilog Beata't Hilom na mababaw
Yaring aking puso'y laging lumiligaw.
Lubád sa Hiligaynon:
Ang akon kalag bug-os nagaduaw
Sa dalan kag baryo nga imo tulombanan
Sa suba sang Beata, Hilom nga manabaw
Gahigugma'y dayon ini'ng akon dughan.
