520NOLI ME TÁNGERE
—Luyag ko nga indi ko ikaw pagluibán, ginùo, kag ilikáw sa imo ang masubô nga palaabuton. Nakadumdom ka sadto'ng tión sang maghambal akó sa imo sa siní man nga baroto kag sa sanag man sini nga bulan, mga isá ka bulan nga nagligad, kapín kon kulang; sadto malipayon pa ikáw. Ang pagpakitlùoy sang mga wala'y palad walâ magdangat sa imo; ginpakalàin mo ang ila mga panumbunganon kay mga panumbunganon sang mga kriminal; labí nga ginpamatìan mo ang imo mga kaaway kag, wala'y sapayán sang akon mga katarungan kag mga pag-alungáy, ginbutang mo ang imo kaugalingon sa luyó sang imo mga manlulopig, kay sa imo sadto nasandig ang paghimò sa akon nga mangín-kriminal ukón magpabaya akó nga patyon sa pagtuman sang isá ka hinambalán nga balaan. Ang Diwa walâ sinâ magpahanugot kay ang tagpangulo sang mga manriribok napatay... Nagligad ang isá ka bulan kag karón nagahunâhonà ka sa laín nga bagay!
—May katarungan ka, Elías, apang ang tawo isá ka tinuga sang mga nagakahanabò: sadto ginbulag akó, malain ang akon buót, anó ang nahibal-an ko? Karón ang malaot nga kapalaran naghukás sang tabón sa akon tabón sa akon mga matá; ang kasubô kag pag-antos sang pagbilanggò sa akon nagpakità sa akon; karón nakita ko ang makasilignì nga hubag nga nagauk-ok sa siní nga katilingban, nga nagapangalapkap sa mga unód kag nagapangayô sang isá ka buklas nga iya pagkakas. Binuksan nila ang akon mga matá, pinakità nila sa akon ang nagawawa nga pilás kag ginpilit nila akó nga magkriminal! Kag sanglit amó inâ ang ila luyag, akó magapilibustero (magamabinatukon), apang tunay nga pilibustero; panawgon ko ang tanan nga may malaot nga kapalaran, ang tanán nga sa sulod sang ila dughan ginabatyag nila ang pagkibô sang isá ka tagipusùon, yadto'ng mga nagpadalá sa imo sa akon... indi, indi ako mag-kriminal indi yadto'ng nagapakig-away tungód sa iya banwa, ang baliskad! Kitá sa tatlo ka gatós ka tuig, gintanay naton sa ila ang aton kamót, sa ila nangayò kita sang gugma, luyag naton nga tawgon silá nga mga utod naton, kag anó ang ila ginsabat? Ang pasipala kag ang pagyagutâ, nga gindumili sa aton ang aton tunay nga kahimtangan sa pagkatawo. Wala sing Diwa, walâ sing mga paglaum, walâ sing tawhanon nga balatyagon — wala na lwás sa katarungan sang kusóg!
