NALIPAY KAAYO si Kapitán Tiago. Sa bug-os sining
makalilisang nga panahón wala sing nagsapák sa iya: wala siá
pagbilanggoá, wala nila siá pagdumilii sa pagpakighambal, wala
pag-usisaa, wala pagpaagyi sing mga dawdawan nga mga kilás
sa dalayon nga pahulom sang mga tiíl sa tubig sa mga duóg sa
idalum sang duta, kag ibán pa nga mga silot, nga nakilala sing
maayo sang pilá ka tawo nga nagatawag sa ila kaugalingon
nga may mga tinun-an. Ang iya mga abyan, buót singganón, ang
iya anay mga abyan (kay siá sumikway na sang iya mga abyan
nga pilipinhon kutob sadto'ng tión nga ginhunahonaan silá sang
Pangulohan nga may kahilabtanan sa ribók) nagbalalik man sa
pagligad sang pilá ka adlaw nga mga pagpaliwaliwa, sa mga
baláy sang Pangulohán. Ang Kapitán Heneral amó man ang
nagsugo nga pahalinón silá sa ila mga ginluntarán, nga ginbilang sila nga indi gid bagay nga mag-unay didto, sa tuman
nga kalain sang buót sang tawo nga pihák sing kamót, nga
maluyag maghiwat sang palaabuton nga Paskwa sa tunga sang
mahamungaya kag manggaranon nga mga kaupdanan.
Si Kapitán Tinong bumalik sa iya baláy nga masakitón, maluspad, nagpalanghubág — ang paliwaliwa nagpakilala nga indi maayo sa iya, — kag nagliwát siá kaayo nga wala paghambal bisán isá ka taga, kag walâ man magyaób sa iya panimaláy, nga naghibi, nagkadlaw, naghambal kag nagbuang sa kalipay. Ang kailó nga tawo wala na paghalín sa iya baláy agúd indì niya masalunoán ang katalagman sa pagyaób sa isá ka pilibustero ukón mabinatukon. Si primo Primitivo na gid, wala'y sapayán sang iya tanan nga kinaalam sang mga nagliligad, indi makabungkag sang iya paghipos.
—Crede, prime, (Patiha akó, primo) — Silíng niya sa iya. —Kon wala ko matutdi ang tanan mo nga papel, kinuga ka nila: apang kon ginsunog ko ang bug-os mo nga balay wala nila
