- 405
nga tabi! sa tingog nga tuman ka gamhanan, nga napilitan sia sa
paglikaw kag nakahimulungon lamang sing: — Tan-awa ang haras
haras nga kotsero! Singanon ko ang iya amo nga tun-an niya
sing maayo ang iya mga suloguon.
—Balik kita sa balay! — Sugò niya sa iya bana.
Ini, nga nahadlok sang silot, lumisò sa iya sungkod nga nagtuman sang sugo.
Nagsugataay sila sang alperes, naghatagay sila sing katahuran kag ini nagpadugang sang kalain sang buot ni Donya Victorina: ang militar indi lamang nga wala magdayaw sang iya panapot kundi tinulok pa gid gani niya nga may pagyubit.
—Indi ka bagay nga maglamano sa isa lamang ka alperes- — siling niya sa iya bana sang makaantad na sila sa iya. — Halos gani sia nagtukas sang iya capacete kag ikaw imo nagtukas sang imo kalu; indi ka makahibalo magtipig sang imo pagkalutaw!
—Sia ang punòan di . . . diri!
—Kag ano ang pulos sa aton? Mga indyo bala kita?
—May katarungan ka! — Sabat niya, nga indi maluyag magpagamo.
Nag-agi sila sa atubangan sang balay sang militar. Si Donya Consolacion yara sa bintana, nga sa kinaandan, nagpanapot sang pranela kag nagpahubot sang pyukos. Sanglit ang balay manubo, nagtulokay sila kag nakilala sia sing maayo ni Donya Victorina: tinulok sia sing mahipos sang Isbing sang gwardya sibil halin sa tiil pasaka sa ulo, kag sang ulihe pinasambil niya ang iya ubos nga bibig, nanupla nga liniso niya ang iya guya sa pihak. Ini ang nagurot sang pagpailob ni Donya Victorina, kag binayaan niya ang iya bana nga wala sing halambuyan, inatubang niya sing tampad ang alperesa, nga nagpalangurog sa kaakig kag indi makahambal. Hinay nga liniso ni Da. Consolacion ang iya ulo, pinanghimbisan niya sia liwat sing matawhay kag magpanupla liwat apang sa labi pa gid ka makaulugot.
—Ano ang luyag mo, Donya? — Pamangkot niya.
—Sarang mo masiling sa akon, Senyora! Kon ngaa nga ginatulok mo ako sing subong sina? May kahisa ka? — Sa katapusan ang natigayon ni Donya Victorina sa paghambal.
—Ako, mahisa ako, kag sa imo? — Hambal sang Isbing nga may katamad. — Huo! Nahisa ako sina’ng imo mga kulong!
—Kari ka, asawa ko! — Hambal sang doktor. — Ayaw sia pag . . . sapaka!
