SA GILAYÓN nabalahubà ang hitabû sa banwa. Sa nahauná walâ sinâ sing maluyag magpati, apang sanglit pilit nga malusót ang kamatuoran ang tanan naghinambalhambal sa daků nga katingala.
Ang tagsa suno sa halintang sang iya kataasón sa katilingban naghimò sang iya mga halambalanon.
—Si P. Dámaso napatay! — Silíng sang pilá ka tawo. —Sang patindugón nila siá, ang bug-os niya nga nawóng naligò sa dugô kag wala na pagginhawá.
—Magpahuway siá sa kalinóng, apang walâ siá liwan nga nahimò kundi magbayad sang iya utang! — Hambal sangisá ka pamatan-on nga lalaki. —Tan-awa ang iya ginhimò karón nga aga sa kombento, indi mahingadlan.
—Anó ang iya ginhimò? Gintampà niya liwat ang koad-hutor?
—Anó ang iya ginhimo? Abi! Isugid sa amon inâ.
—Nakità ninyo karón nga aga ang isá ka katsilang' mestiso nga naggwâ sa sakristiya samtang may wali?
—Huo! Hùo nakità namon siá. Gintulok siá ni P. Dámaso.
—Kay... sang pagkatapos sang wali, pinatawag siá kag pinamangkot kon ngaa nga naggwâ siá. "Indi ako makahangóp akó sang tinagalóg, Padre," sabát niya. "Kag ngaa man naglahóg ka sa pagsilíng nga yadto griego?" Singgit sa iya ni P. Dámaso nga sinampal niya. Sumabát ang pamatan-on, kag nagsumbaganay ang duhá tubtob nga gintambagán silá.
—Kon inâ nahanabò sa akon..., — kumód sang isá ka tumolùon nga nagpagot.
—Indi ako makauyon sang ginbuhat sang pransiskano, sabát sang isá. —Kay ang Pagtulùohan indi dapat nga ipatuman bisán kay sin-o nga isá bilang ka silot ukón pagpaantos; apang
ginadayaw ko inâ kay nakilala ko yadto nga pamatan-on, nahibal-
