mga dalaga, nga nagapadungóg sa aton sang ila pagtambong? Sa akon, ang kadalagahan nga pamatan-on katulad sang mga arpa nga Eólica1 sa tungâ sang kagab-ihon: pamatian ninyo silá sing maayo, agúd ang indì masugid nga katuyom sang ila mga tunóg nga nagabatak sang kalág sa kalangitan nga wala'y katubtoban kag sa labíng' ginahangád..
—Taslangdon, nagapamalaybay ka! — Malipayon nga hinambal sang eskribano, kag tinayhong nila nga duhá ang kopa.
Indì ko mapunggan,— silíng sang Alkalde nga pinahiran niya ang iya mga bibig. —Ang kahigayunan kon indi makahimò sing isá ka buyóng, makahimò sing isá ka mamalaybay. Sang pamatan-on pa ako nagsulát akó sing mga binalaybay, kag sa pagkatutùo, indi man mga malain.
—Kon amó, ikaw Taslangdon indi mangin-mainunungon sa mga Isbing sa pagsunod kay Themis! (2) —Hambal nga may patalupangod sang aton madiwatahon nga tinugyanán nga manunolat.
—Psh! Anó ang luyag mo? Ang maglibot sa tanán nga bahin sang katilingban amó ang akon dalayon nga gindamgo. Kahapon nanguhà akó sing mga bulak kag nag-amba sing mga ambahanon, karón ginauyatan ko ang tagsàon sang Hustisya kag nagaalagád akó sa katawohan, bwás...
—Bwás idap-ong nimo Taslangdon ang tagsàon sa kalayo agúd makahatag sing kainit sa imo sa panahón sang katugnaw sang kabuhi kag pagauyatan mo ang palangakòan sang pagkaparì, — sugpon ni P. Sibyla.
―Psh! hùo... indi... ang pagkaparì indì kay amó ang akon matahúm nga handum; maskin sin-o nga magtinguhâ makakuhà sinâ. Isá ka puloy-an sa Aminhan sa pagpaligad sang tingadlaw, isá ka balay sa Madrid kag pilá ka pagkabutáng sa Andalucía sa panahón sang tigtulognaw. . . magapangabuhî kitá nga madumdomán naton ang aton minamahal nga Filipinas Nahanungod sa akon indi makahambal si Voltaire; nakapangabuhî kitá sa sini nga mga tawo sa pagmanggad lamang kag sa pagpa
__________________________
(1) Eólica —Ang nahanungod sa Eulio ukón Eolia, isá ka pungsod sa Asia Minor nga kolonya sang Grecia Ang eólika isá ka katapo sang gubán sang katawahan nga gresyanhon. (2) Indi nangin-mainunungon sa mga Isbing sa pagsunod kay Themis — Binayaan niya ang pagsulat sang binalaybay sa pagdulop sing bug-os sa Hukmanan ukón sa pag-alagad sa pangulohán. Isá ka sari sang pulolungon nga ginatawag nga sinecdoque nga ang butang nga waay lawas ginahangóp nga may lawas.
