—Walâ silá sing, liwan nga maayo nga mapili!— Sabát siní.
Ang mga prayle nagtinulokáy; ang ila mga panulok buót masiling: "ang Kapitán Heneral nagtuman lamang sang iya luyag, nagapakadiutay sa aton, dapat siá magdayon sa kombento," apang sanglit amó man iní ang ginhunâhonà sang tanán naghilipos silá kag wala na sing nagpahayag sang iya panghunâhonà.
—Nakahambal na silá sinâ sa akon kahapon,— siling sang Alkalde,—apang ang Iya Taslangdon walâ pa sing pat-od nga kabubut-on.
—Nakasayod ikaw, Gg. Alkalde, kon anó kalawig nga nagahunâhonà ang Kapitán Heneral sa pagpabilin dirí?—Pamangkot sang alpéres nga ginkibáng.
—Sa pat-od walâ. Ang Iya Taslangdon maluyagón maghimò sang mga butang nga may kibót.
—May nag-abót na man nga ibán pa nga mga telegrama!
Yadto tuhoy sa Alkalde, sa alpércs kag sa gobernadorsilyo, nga nagpasayod sang amó man: namutikán sang mga prayle nga walâ sing isá nga ginpadala sa kura.
—Ang Iya Taslangdon magaabót sa ikaapat ang takna sa hapon, mga ginuo!— Silíng sang Alkalde sing maligdong.—Saráng kitá makakaon sing matawhay!
Indi maglabí ang ginhambal ni Leónides sa Termópilas: "Karón nga gab-i manihapon kitá kabuylog kay Pluton!" Ang sinugilanonáy magbalik sa kinaandan.
—Natalupangdan ko nga walâ dirí ang aton mangwawali! — Hambal nga may katahap sang isá sang mga alagád, nga may nawóng nga but-anan, nga walâ gid makabukâ sang iya bàbà kutob sang tìón sang pagsugod sang paniaga kag karón pa lamang makahambal sa bug-os nga aga.
Ang tanan nga nakasayod sang maragtas sang amáy ni Crisós- tomo naghinagyòay kag nagpinangilayay nga buót masilíng: "Pagtikáng ka! Walâ ka'y palad kutob sa pamunò!" Apang ang ibán nga may labí nga kabalaka nagsalabát:
—Ayhan nalapyò sia sing diutay...
—Anó sing diutay? — Tugdà sang alpéres. — Dapat nga lapyò gid siá kag, sunô sa ginahambal nila dirí, binudlay gid. Daw anó nga walil
