isá ka buluthòan; ang buluthòan amó ang sadsaran sang isá ka
katilingban, ang buluthòan amó ang tulon-an diín nasulat ang
palaabuton sang mga banwa! Itudlo sa amon ang buluthòan sang
isá ka banwa kag isugid namon sa inyo kon anó inâ nga banwa.
"Mga pumoluyo sa San Diego! Magpasalamat kamó sa Diwa, nga nakahatag sa inyo sing matarong nga mga parì, kag sa Pangulohán sang Iloy nga Pungsod nga sa wala'y pahuway nagpalapnag sang pagtolon-an sa sini nga mauya nga mga pulô, nga gin-apinan niya sa landong sang Iya mahimayàon nga lambong! Magpasalamat kamó sa Diwa nga naluoy sa inyo nga dinalhan kamó sining' mapainubuson nga mga pari nga naghatag sa inyo sing kapawà kag nagtudlo sa inyo sang langitnon nga tinagâ! Magpasalamat kamó sa Pangulohán nga nakahalad, nagahalad kag magahalad sing madamò nga pagbatás sa inyo kag sa inyo kaanakán!
"Kag karón nga ginabenditahan ang nahauná nga bató siní nga labing' mapuslanon nga baláy, kamí, ang Alkalde Mayor siní nga puód, sa ngalan sang Iya Kagamhanan, ang Harì, bantayán siá sang Diwa, ang Harì sang España, sa ngalan sang bantog nga Pangulohan nga katsilà kag sa idalum sang pagbantay sang iya putli kag madinalag-on sing dayon nga hayahay, ginahalad namon iní nga palatuntonan kag sugdan na naton ang pagpatindog siní nga buluthòan!
"Mga pumoluyò sa S. Diego, mabuhi ang Hari! Mabuhì ang España! Mabuhi ang mga parì! Mabuhi ang Pagtulùohan nga katóliko!"
—Mabuhi! Mabuhi! — Sabát sang madamò nga tingog, — Mabuhi ang Gg. Alkalde!
Iní nanaog sa kutkot sang ulihe nga daw harianon sa mga tunóg sang músika nga nagsugod sa paglanton; nagbutang sing pilá ka kandos sang sinamò nga semento sa ibabaw sang bató kag sa amó man nga hulag nga daw harianon katulad kaina bumalik sa pagsakà.
Ang mga alagad namalakpak.
Si Ibarra nagtanyag sing isá pa ka inogkandos nga pilak sa kura nga, sang tapos niya matulok sing makadali, nanaog siá sing mahinay. Sa tungâtongà sang hagdanan binatak niya ang iya mga matá sa pagtan-aw sang bató nga nagkabit nga ginsapnay sang mabakod nga mga kable, apang isá lamang yadto ka tión kag pinadayon niya ang pagpanaog. Ginhimò niya ang ka-
