“Natapos ang misa nagsaka kami tanan sa kombento kaupod sa mga pinuno sang banwa kag sang iban nga mga tawo nga tinatahod diin ginmuma ang tanan sing maayo sa gawi nga mahinhin, may pag-abiabi kag sa pagdulot nga bugana nga amo ang batasan sang labing’ talahuron nga P. Fr. Salvi, nga iya sila ginhatagan sing mga abano kag isa ka mabakod nga pamahaw nga ginhimos sang Hermano Mayor sa silong sang kombento sa tanan nga may kinahanglan sa pagpaugdaw sang mga kinahanglanon sang iya suloksulok.
“Sa bug-os nga adlaw wala sing nakulang sa pagpasadya sang pandot kag agud mapadayon ang kinalipay sa kinabatasan sang mga katsila, nga sa amo nga mga hitabo indi gayod mapunggan, nga ila ginpakita sa mga ambahanon ukon mga sinaot, sa iban nga kinaandan kag malipayon nga kalingawan, nga sila may tagipusiion nga putli kag mabakod, nga ang mga kasubo indi sa ila makapahamak kag tuman lamang nga sa isa ka duog magtipon ang tatlo ka katsila agud ang kasubo kag ang malain mawala dira. Gani nga ang paghangad sa Terpsicore (ang Isbing sang saut kag Kinasadya) ginhiwat sa madamo nga balay, apang labi gid sa balay sang lutaw kag hambadan nga pilipinhon, diin kami tanan gin-agda sa pagkaon. Tugti ako sa pagsiling sa imo nga ang salusalo, nga bugana kag nadulot sing labing’ maayo, amo ang ikaduha nga huwad sang salusalo nga ginhiwat sa mga pagkasal kanday Cana ukon Camacho (Ang kasal ni Camacho isa ka bahin sa wala’y kamatayon nga nobela, Don Quijote de Cervantes), nga ginkaayo kag gindugangan pa gid. Samtang nga ginkalipayan namon ang pagkaon nga ginhimos sang isa ka kosinero gikan sa Campana, ang orkesta naglanton sing mga malulot nga ambahanon. Ang tuman kagayon nga lin-ay sang puloy-an nagsuot sang panapot nga ministisa kag may isa ka lugway sang mga batomaidlak, kag sia bilang ang nangin-hara sang pandot. Ginhinakitan namon sa alibutod sang amon nga kalag nga ang diutay nga pagtipalo sang iya matahum nga tiil nakadumili sa iya sang mga kaUpayan sa pagsaot, kay abi kon hukman namon sia sa tanan nga kahimpitan nga iya ginpakita, si Gining de los Santos ayhan nakasaot katulad sang isa ka diwata.
“Ang Alkalde sang puod nag-abot karon nga hapon sa tuyo nga magpakaligdong sa iya pagtambong sang palatuntonan sa pagkaaga. Ginkasub-an niya ang sablag sang kinilala nga tag-iya sang mga pagkabutang nga si Gg. Ibarra nga, salamat sa Diwa, suno sa sugid sa amon, maayo na.
“Karon nga gab-i may prosesyon nga maligdong, apang nahanungod sini sugiran ko ikaw sa akon sulat bwas sa aga, kay.
