biyà sang alibangbang sa alikabá makilal-an niya ang tanan nga
bulak; tuman na sa iya ang maglupád sing makadali sa pagpainit
sa bulawanon nga mga
silak sang
adlaw agud mawala ang pagpigos
sang balayán. Ang bag-o nga kabuhì makità sa bug-os nga lawas
sang dalaga: ang tanán iya nakita nga maayo kag matahúm; nagpakilala sang iya paghigugma nga may kaanyag sang kaputli nga,
walâ sia sing nakita kundi mga panghunâhonà nga putli, walâ niya
mahibal-i ang kabangdanan sang di-tunay nga mga huyâ. Wala'y
sapayán gintabunan niya ang iya nawóng sing abaniko kon hatagan
nila siá sing masadya nga lahóg, apang ang iya mga mata nagyuhóm
kag ang diutay nga pagpalangurong nagpanalaytay sa bug-os niya
nga kalawasan.
Ang mga balay nagsugod sa pagsindi sing mga sugâ, kag sa mga dalan, nga ginlibután sang músika, ginsindihan nila ang mga sulô nga kawayan kag kahoy, nga mga inilóg sa simbahan.
Kutob sa dalan lapós sa nabuksan nga mga bintanà, nakità ang mga tawo nga masakò sa sulód sang mga baláy, sa tungâ sang kasanag kag mga kaamyon sang kabulakan, sa mga tunóg sang pyano, arpa ukón orkesta. Nagtalabók sa mga dalan ang mga insik, mga katsilà, mga pilipinhon, kag iní silá nagsuluót sang mga panapót nga europanhon, ukón sang mga panapton nga tumandok. Naglalakát nga nagginumongumon nga nagpalanikól kag gindusô nila ang mga sulogùón nga nagdalalá sang mga karne kag mga manók, mga bumoluthò nga nagpalanapót sing puti, mga lalaki kag mga babae, nga madali dalasàón sang mga karwahe kag mga kalesa nga, wala'y sapayán sang tabi sang mga kotsero, mabudlay silá makahatag sing alagyan.
Sa atubangan sang baláy ni Kpn. Basilio, ang pilá ka pamatanon nagyaób sa aton mga kilala kag inagda nila nga magsakà sa baláy. Ang masadya nga tingog ni Sinang nga nanaog sa hagdanan nga nagdagandan tumablà sang tanan nga pamalibad:
—Sakà kamó anay sing makadali agúd makabuylog akó sa inyo, —siling niya—Ginatak-an akó mag-unay sa luyó sang mga walâ makilal-i nga ang ginhambal lamang amó ang mga manók kag mga baraha.
Nagsakà silá.
Ang kadak-an napunô sing mga tawo. Ang ibán nagpalalapít sa pagyaób kay Ibarra nga ang iya ngalan nakilala sang tanán; nagtululok silá nga kinunyag sa kaayuayo ni María Clara, kag ang
