SA BALAY NI KAPITÁN TIAGO may nahimò man sila nga dalagkò nga hinimos. Nakilala naton ang tagbaláy; ang iya ugali sa pagpailâilâ, kag ang iya bugál sa pagka-manilan-on dapat magpakahuya sa kadagayà sa mga puodnon. May isá pa siá ka katarungan nga nagapilit sa iya sa paglutos sa ibán; yarà ang iya anák nga si María Clara kag yarà man ang iya palaabuton nga umagad, nga siá lamang ang iya ginahambal.
Sa pagkamatuod; ang isá sang mga labing' maligdong nga pamantalaan sa Manila nakahalad sa iya sing isá ka salaysay sa iya nahauná nga pamihák, nga gintig-ulohan, Ilogá Siá! nga naghanay sa iya sing madamò nga kaisipan kag naghatag sa iya sing mga pagdayaw. Gintawag siá nga ang pamatan-on nga maalam kag manggaranon nga pahunanan; may duhá pa ka dalán sa ubós, ang kinilala nga mabinuligon; sa masunod nga pinig, ang bumoluthò ni Minerva nga nakakadto sa llóy nga Pungsod sa pagyaób sa tunay nga dutà sang mga arte kag mga syensya kag sa ubós-ubós pa gid ang katsi¹à nga pilipinhon kag ibán pa. Si kapitán Tiago namulá sa madamò nga pagdayaw kag nag-isip siá kon balá dapat man nga magpatindog siá sing isa ka kombento sa iya kaugalingon nga kahinguyangan.
Kutob sang pilá ka adlaw nga nagligad nag-alabót sa balay diín nagpuyo kanday María Clara kag tiyà Isabel, ang madamò nga kinaha sang mga pagkàon kag mga ilimnon gikan sa Europa, dalagkò nga mga espeho, mga kwadro kag ang pyano sang pamatan-on nga dalaga.
Si Kpn. Tiago nag-abót sang amo nga tughapón nga adlaw: Sang maghalók sa iya kamót ang iya anák, gindulotan niya sing isá ka matahúm nga medalyon nga bulawan nga may mga batomaidlak kag mga esmeralda, nga may unód nga isá ka bahin sang
sakayán ni San Pedro diín nagapungkò ang aton Ginùo sang pagpangisdà.
