Sa daků nga katingala kag wala'y sapayán sang sininggit sang tanán, ang timoníl lumompat sa sulod sang bunoan.
—Dal-a ini nga kutsilyo! —Singgit sa iya ni Crisóstomo nga kinuha niya ang isa ka malapad nga sundang nga Toledo.
Apang ang tubig nagsakà na sa banhay sang isá ka libo ka ibwal kag ang idalum daw tinakpan nga makatilingala.
—Jesús, María kag José! Hinalì nga namitlang sang mga babáe.— May matabô sa aton! Jesús, María kag José!
—Indì kamó magkatahap, mga ginang,— hambal sa ila sang tigulang nga bangkero. - Kon may ara nga isá sa bug-os nga puód nga makahimò sinâ, inâ amó siá.
—Sin-o ang ngalan sinâ nga pamatan-on?— Pamangkot nila.
—Ginatawag namon siá kay Timonil: sia ang labing' maayo nga akon nakità; walâ lamang niya maluyagi inâ nga pangità.
Naghulag ang tubig, nag-alimbukád: ayhan sa idalum sang tubig may isá ka inaway; nag-uyóg ang mga lag-i. Ang tanán humipos, pinunggan nila ang pagginhawá. Hinugot ni Ibarra ang pag-uyat sang polo sang mataliwis nga kutsilyo.
Daw matapos na ang inaway. Umotwas sa ibabaw ang ulo sang pamatan-on, nga sinumalang sang sininggit nga malipayon: ang mga matá sang mga babáe napun-an sing luhà.
Ang timoníl tumaklas nga dinalá niya sa iya kamót ang utbong sang lubid, kag sang makasakà na siá sa tulungtongan binutong niya.
Gumwa ang dakû nga sapat, ang lubid nabalighot sing makaduhá sa iya liog kag sa iya duhá ka tiil nga pangulihe. Daků, sunô sa ginpasayod ni Leon; may duág, kag sa iya likurán nagtubò ang lunhaw nga lumot, nga iní sa mga buaya amó ang mga uban bilang kon sa mga tawo. Nag-ugayong katulad sang baka, ginlapdusán niya sang iya ikog ang mga lag-i, nagkapyot siá dirâ, kag ginngángá niya ang iya maitúm kag dakú nga bàbà nga nagpagwâ sang iya malagbà nga mga bangkil.
Binatak siá sang timoníl nga siá lamang: walâ sing nakadumdom sa pagbulig sa iya.
Nalwás na sa tubig kag nabutáng sa ibabaw sang tulungtongan, tinapakan niya, sa makusog niya nga kamót kinipot niya ang iya masangkad nga mga sag-ang kag hinigtan niya ang bàbà sing mabakod nga pagbalighot. Ang sapat naghimulat sa iya katapusan nga paghimud-os, pinakulô niya ang iya lawas, linapdusán niya ang salóg sang iya gamhanan nga ikog, kag, sa pagpalag-
