Hinali lang nabatian ang makatilingil nga hum: Nagsininggit ang mga babae kag tinapnan nila ang ila mga dulonggan. Ang nangin-seminarista yadto nga si Albino nga naghuyop sa bug-os nga kusog sang iya mga baga sang budyong nga sungay sang karabaw, nga gintawag nga tambuli. Ang kinadlaw kag kinasadya bumalik: ang mga mata, nga napun-an sing mga luha, binuslan sing mga yuhom.
—Apang, himuon mo kami nga mga bungol, erehes? — Singgit ni tiya Isabel sa iya.
—Ginang! — Sabat sang nangin-seminarista nga maligdong, — nakabati ako sang ginsugid nahanungod sa isa ka imol nga manogtrompeta, didto sa mga baybayon sang Rhin, nga sa iya lamang paghuyop sang trompeta nakapangasawa sia sang isa ka harianon kag manggaranon nga lin-ay.
—Matuod ina, ang manogtrompeta sang Sackingen! — Tugda ni Ibarra nga indi makahimo nga indi magbuylog sa bag-o nga kinasadya.
—Nabatian mo? — Padayon ni Albino — Hanti tan-awon ko kon makaagum man ako sang amd nga kapalaran.
Kag naghuyop sia uli sing labi pa gid kabaskog sang matunog nga budyong, nga pinatupad na gid niya ang buho sa mga dulonggan sang mga babaeng’ pamatan-on nga daw labi nagpangasubo. Gani, nga may diutay nga kinagula: pinilit sia sang mga iloy sa pagpahipos sa mga hampak sang tsinilas kag mga kusi.
—Aguy! Aguy! — Siling niya nga pinikpik niya ang iya mga butkon. — Ang antad nga nagaulot sa Filipinas kag sa mga baybayon sang Rhin! O temporal O Mores!1 Sa iban ginahatag ang pagdayaw kag sa iban mga kahuloy-an!
Ang tanan nagkinadlaw na, pati man si Victoria, apang si Sinang, ang may malipayon nga mga mata, naghutik kay Maria Clara!
—Nalipay ka! Ay! Ako subong man maamba kon mahimo ko!
Si Andeng nagpahibalo sa katapusan nga ang sabaw sarang na makabaton sang iya mga dumuloaw.
Ang bata, nga anak sang mangingisda, sumaka na sa ibabaw sang bunoan sang punot, nga nahamtang sa utbong nga labing’ makitid sini, diin sarang masulat ang Lasciate ogni speranza voi
________________
(1) O Temporal O Mores!— Hambal nga linatin. O panahon! O pamatasan! Amo ini ang ginhambal ni Ciceron nga ginkasub-an niya ang kalautan kag ang pegkadimasinapakon sang iya mga kaupdanan.
