Ang mga pamatan-on nga nagpamati sini nga mga butáng nagpangilayay kag nagyuhomay; ang ibán may ila man silá nga ginsugilanon kag walâ pagsapák.
May isá lamang ka tawo nga amó ang nagin timoníl, nagunay nga mahipos nga walâ maghilabót sa amó nga kinasadya. Isá Isa yadto ka pamatan-on nga mabakod sing panglawasón kag may pangguyahon nga kalawilihan tungod sa iya dalagkò nga mga matá nga masulub-on kag may mga bibig nga mapag-on sing banhay. Ang iya mga buhók nga itúm, malabà kag walâ mahusay, nagtunton sa iya mapag-on nga liog; isá ka bayù nga may samay kag maitúm nagpakità nga masinág sa iya mga pligis ang iya gamhanan nga mga kusóg nga nag-amot sa iya bulbulón kag hublas nga mga butkon sa pagdumala, subong sang isá ka bulbol, sang isá ka malapad kag tuman ka daku nga bugsay, nga iya gingamit nga timon sa pagtuytoy sang duha ka baroto.
Makapilá nga namutikán siá ni María Clara nga nagsagad tulok sa iya: sinaylo niya gilayón ang iya panulok sa ibán nga bahin kag nagtulok sa malaya, sa bukid, sa baybay. Nabalaka ang pamatan-on nga babae sa iya pagbatyag sang kamingaw kag kinuhàan niya sing pilá ka bilog nga galyitas kag hinatagan. Tinulok siá sang timoníl nga may katingala, apang ini nga pagtulok makatión lamang; kumohà siá sing isá ka bilog kag magpasalamat sa tingog nga daw halos mabatián.
Kag wala na sing nakadumdom sa iya. Ang masadya nga kinadlaw kag ang sinabtanay sang mga pamatan-on walâ makapakibô sang maskin isá ka kusóg sa iya nawóng; walâ sa iya makapakadlaw ang masinadyahon nga si Sinang nga bumaton sang mga kusi nga nagpilit sa iya sa pagpasampok sang iya mga kilay sing makatión sa pagbalik na man sa iya kinasadya subong kaina.
Natapos ang pamahaw, pinadayon nila ang ila pagpaliwaliwa tubtob sa mga punót.
May duhá ka punót, nga nabugsok nga may antad sa isá kag isá; ang duhá iya tanán ni Kpn. Tiago. Kutob sa malayô makità ang pilá ka tulabong nga nagtulungtong sa mga utbong sang mga kawayan sa punót, sa gawi nga nagpalalibóg, samtang ang pilá ka pispis nga putî, nga ginatawag sang mga tagalog nga kalaway naglulopád sa nagkalainlain nga paladulongan, nga nagpahanól sang kadaygan sang linaw sa kuyaphad sang ila mga pakpak kag pinuno nila ang taliwalà sang ila magahod nga mga huní.
