Mao kini gayud hinuon ang nakulang kanako, ginoo Alkalde! Apan ang Alkalde wala mamati kanako ug giingon ako niya nga managsulti lamang kita niana sa human ang pangilin.
—Kon maó diay kana, na, hinabangan ka unta ni Bathala! —matud sa tigulang mihana dayon paglakaw.
—Dili ka ba diay motan-aw sa dula?
—Salamat! Alang sa mga salimuáng ug mga buhat nga binuang igo na ako kaayong usará —mitubag ang pilosopo inubanan sa kinataw-an nga mabiaybiayon; —apan karón nahinumdom diay ako: wala ba makapahibulong kanimo ang kinaiyá sa atong lungsod? Mahigugmaon siya sa kahusay apan layhan sa mga talan-awon nga may away, sa mga dumog nga mabangís; makiangayon siya apan magahalad sa mga emperador, mga hari ug mga prinsipe; wala siyay tinuhoan apan maputo sa mga galastohan aron masadya ang mga pangilin; ang atong mga babaye mga malumo ug matam-is apan mangabuang sa kalipay kon ang usa ka prinsipe mohana na paghandus sa bangkaw.. Nahibaló ikaw sa hinungdan niini? Ang hinungdan...
Miabut si María Clara kuyog sa iyang mga higala, ug naputol ang panagsulti sa duha ka tawo. Gidawat ni Don Filipo ang mga dalaga ug giubanan niya ngadto sa ilang lingkoranan. Sa luyo nagasunod ang kura kuyog sa usa ka pransiskano ug pipilá ka mga Katsila. Uban sa kura nanghiabut usab ang pipilá ka mga molupyo sa lungsod nga walay laing buhat kon dili ang pagkuyogkuyog sa mga prayle.
—Nga pahiagumon usab unta sila ni Bathala sa iyang ginharian didto sa laing kinabuhi! —miingon si pilosopo Tasyo nga milakaw.
Gisugdan ang dula nga ginganlan Crispino e la Comare, inapilán ni Chananay ug ni Marianito. Ang tanan namati ug mitan-aw sa intablado, gawás sa usa ka tawo: si pari Salví. Kiní daw walay laing giadto kon dili ang pagbantay lamang kang María Clara kansang kasubo nakadugang sa iyang kamabihagon ug kaanyag, busa maoy hinungdan nga mahiurong ang tawo nga magasud-ong kaniya. Apan sa mga matá nga nanghilawom sa pransiskano mabasa ta nga ang iyang gibati sa pagsud-ong kang María Clara lahi sa ubán: kadtong iyang tinan-awán nagpasabut nga ang iyang kasingkasing natugob sa kasakit: dagway mao kadto ang tinan-awán ni Caín nga sukad sa layo nagasud-
