—Sayaw, sayaw, kondenada, maldita! Maldita ang inahán nga mipahimugso kanimo -nagkanayon si Donya Consolación; halá, sayaw! Kon dili ngani, patyon ko ikaw niining pudlos!
Ug samtang ang usa niyang kamut nagagunit sa buang ug ang pikas nagalatús, nagaluksòluksò ug nagasayaw usab siya.
Sa nadugay na, ang buang nakasabut, ug gilihok ang iyang bukton. Sa pagtan-aw niini, si Donya Consolación mipahiyum, nianang pahiyum nga sama sa pahiyum sa usá ka yawa nga nahamuot.uyamut tungud sa matulin nga pag-uswag sa usa niya ka tinon-an; niadtong pahiyuma adunay kasilag, pagtamay, pagyubit ug kabangis: ang usa ka talidhay dili makapahayag labaw sa gipahayag niadtong pahiyum.
Labihan nga kalingaw ni Donya Consolación niadtong talanawona nga wala makabantay nga miabut ang iyang bana hangtud sa pagpatid na niini na ganhaan, nga natukás sa dakung kasaba.
Nahitungha ang "Alferez" nga naluspad ug makahahadlok ang panagway; nakita niya ang nahitabo didto ug mitan-aw sa iyang asawa nianang tinan-awan nga makalilisang. Si Donya Consolación wala molihok sa dapit nga iyang gibarogan ug nagautas pahiyum sa walay diyutay nga paghikulipo.
Sa dakung kalumo gigunitan sa "Alferez" ang abaga sa buang nga nagasayaw ug iyang gipahunong. Ang buang miginhawa ug mihinayhinay paglingkod sa salóg nga nagkadugo.
Ang kahilum mipadayon: ang "Alferez" nagahangús; ang iyang asawa, nga nagapaminaw kaniya, mipunit sa pudlos ug nangutana sa iyang bana sa tingog malinawon ug pinayamtak:
—Naunsa ka man?... Wala ka ngani manghatag maayóng gabii kanako!
Ang "Alferez" mitawag sa mutsatso ug wala lamang motubag sa pangutana sa iyang asawa.
—Dad-a ngadto kining babaye— miingon siya;— pahatagi kang Marta laing sinina ug unya patambali! Pakan-on mo siya pag-ayo ug hatagán maayong higdaanan... Bantaye baya nga dili siya daugdaugon! Ugma ihatud siya sa balay ni G. Ibarra.
Sa pagkahuman, gitakpan ug gitrangkahan niya ang ganghaan ug miduol sa iyang asawa.
—Nag-ayo ka gayud nga palit-aron ko ikaw!— matud sa "Alferez" nga nangumo.
