Natunóg dayon sa lungsod ang nahitabo. Sa sinugdan waláy mituo, apan kay tinuod man gayúd, ang tanan iyahay lamag hingangha.
Ang tagsatagsa nagahisgot sa nahitabo sumala sa pagbati sa ilang tagsalagsa ka kasingkasing.
-Si pari Dámaso namatay! -nagkanayón ang ubán; sa pagsakwat kaniya, ang iyang nawóng nabulit sa dugo ug nawad-an siyá sa ginhawa.
-Nga papahulayon siyá ni Bathalà sa kalinawan, apan igo lamang siyà nga nagabayad sa iyang utang -matud sa usá ka batan-on. Kadtong iyang gibuhat ganina sa buntag didto sa kombinto labihán na kaayo.
-Kay unsa may iyang gibuhat? Gibunalan na ba usáb niya ang kuwadhutór?
-Unsa ugód ang iyang gibuhat? Suginli ngani kamí.
-Nakadiparal ba kamó ganina sa buntag niadtong usá ka mestiso espanyol nga migula sa ganghaan sa kristiya samtang ang parì nagawali?
-Oo, nakakita kamí. Gitutokan ngani pagtan-aw ni parì Dámaso.
-Sa pagkahumán sa wali, gipatawag siya sa pari ug gipangutana nganong migula siyá. "Dili akó makasabút sa tinagalog, padre," mitubág ang mestiso. "Nan, nganong nagbugalbugal ka man pag-ingon nga kadtong akong wali dili masabút?", gisinggitán ni pari Dámaso ug gidunganán ug sumbag. Ang batan-on mibalus ug nagsumbagay siláng duhá hangtud nga giuláng na.
-Kon akó pay hitaboan niana -mibagulbol ang usá kabatan-ong tinon-an.
-Wala ako makauyon sa gibuhat sa paring pransiskano matud pa usáb sa usá-, kay ang tinuhoan dili angay ipaham-
