Bisan ang mga pulong gisamual ug dili maayong pagkalitok
tungud sa tingog nga pinaagi sa ilong, ang tagsatagsa sa mga pari
nga mihimo sa misa pulos maayong miawit, gawas sa oficiante,
nga mao si pari Salvi, kay ang iyang tingog nagakurog ug
diyutay ug usahay ngani mayabag siya, sa dakung kahibulong sa
nanagpakaila kaniya. Apan ang iyang panlihok angayan kaayo
ug walay diyutay nga sayop; inig-awit niya sa Dominus vobiscum
iyahat sa atop ang iyang mga mata ug pahiligon ug diyutay
ang iyang liog. Kon sud-ungon ta ang panagway ni pari Salvi
inigpakabaho niya sa aso sa insiyenso, makaingon kita nga si
Galeno may katarungan sa pag-ingon nga ang aso nga mosulod
sa ilong sa tawo mosaka sa ulo, kay ang liog sa pari motikig man,
ang iyang ulo ¡hangad sa taas ug unya mohinay paglakaw padulong
sa taliwala sa alampoanan, sa dakung kaligdong ug pinarayeg nga
panlihok, hangtud nga si Kapitan Tiyago nakaingon sulod sa iyang
hunahunil nga ang maong pari labi pang ambungan ug maligdong
kay sa magdudulang Insik nga sipat nga iyang nakita sa usang
gabii, nagasul-ob saput sa usa ka emperador,
nabulit sa pintal ang nawong, may mga bandilang gagmay
sa buko-buko, bungot nga binuhat sa lambungay sa kabayo ug
mga sapin nga dagku ug tag-as ug tikod.
—Walay duhaduha —matlid pa sa hunahuna ni Kapitan Tiyagò, —usa lamang ka kura nato labing ambungan ug talahuron kay sa tanang mga emperador.
Sa katapusan miabut na gayud ang takna sa pagpamati kang pari Damaso. Ang tutulo ka pari nga nanaghimo sa misa nanglingkod sa ilang dagkung lingkoranan ug nanagligdong pag-ayo; ang Alkalde ug ang ubang mga dagkung-tawo. nga nanagbitbit ug mga baston, nanglingkod usab; nahilum ang musika.
Kadtong kalit nga pagkahilum nakapamata kang Hermana Pute nga nagahagok na tungud sa musika. Sama kang Segismundo, kun sama sa manluluto sa sugilanon ni Dornroschen, ang unang gibuhat sa tigulang sa pagmata niya, mao ang paglagpak sa tangkugo sa iyang apo nga nahikatulog usab. Ang bata misinggit ug mihilak intawon, apan nalingaw lamang dayon sa pagsud-ong sa usa ka babaye nga nagsamot tampok sa iyang dughan inaghat sa kadasig sa iyang pagtuo.
Ang tanan naninguha pagpahiluna pag-ayo; ang walay bang-
