Dhǎddhi tana djrèja laèn arè ta' boeroeng dhǎddhi bǎn-ghibǎnna Patientia, lamon Patientia noro' patona orèng."
Eduard sareng mèreng ḍhaboena towanna, seksek ḍǎḍǎna, ta' pangghi sè èatorraghiă. Pèkkèrra sapanèka: ,,Sapa sè djhoeḍhoe so Patientia, ijă djǎrèja sè ngaollè tana Arnwood." Mowana Eduard nalèka ghapanèka saklangkong potjet.
Saamponna Eduard pas ngèrèng towan Kobǎsa neḍḍhǎ. Bǎktona nèḍḍhǎ Clara ta' pegghǎ' sè atanja ka Eduard, aponapa robăna mè' tje potjetta. È bǎkto ghapanèka Eduard pas toḍoes sè bǎs-abǎsana ka Patientia. Saamponna marè neḍḍhǎ, Eduard pas lebbhoe ka kamarra, amarghǎ njello tjèṭak. Abă'na namong ling-ghoelingan saos è katèḍoenganna, ta' poron ngèḍḍha tèḍoeng, amarghǎ mèkkèrè tana Arnwood, sè ampon èkaollè towanna. Pèkkèrra sapanèka: ,,Patientia rowa bhǎ' trèsna'a ka sèngko', akanța tang katarèsna'an ka abǎ'na. Kèra sèngko' endjǎ', apa polè satèja rèng la dhăddhi............ orèng soghi, la sadjǎn ta' kèra enḍǎ' ka sèngko'; la tantona abǎ'na sè èkaollè orèng laèn; mon bǎrijă la èlang ongghoe tang tana è Arnwood rowa. Alla, lowan sè aḍhǎboe djhǎ' mabǎliǎ tana djrèja ḍǎ' ka sapa'a sè mènta, anggher bhenḍer djhǎ' ahli bǎrissǎ djǎrèja ta' tjoma wa-kowa bhăi, tjoma èkaghǎbǎj parsanḍhǎn, djhǎ' salèrana djhoedjhoer ghǎlina, sopprèna rèng-orèng ma' partjadjǎ kabbhi ka salèrana. Mon lakar ahadjhǎt èpabǎliǎ ongghoe tana djǎrèja, arapa ma' èpabǎliă ḍă' na' potona Beverley, mè' ta' ḍǎ' Parlemmèn? Kastana sèngko' sè ondhoer ḍări alas, djhǎ' anoa ghoe ta' tjè' sennengnga tang atè, nomtom atanè bhǎi. Sanaddjhǎn sèngko' tanetta èḍinna', ḍoe apa ghoenana, djhǎ' rèng la ta' anḍi' pangareppan pa-apa polè, molana sèngko' ennengnga ḍinna' ngala'a saparlona bhǎi; lagghoe' sèngko molèa, apèrembhǎghǎna so Humphrey parkara rèja; kaḍoekalèna tang tan-trètan binè' rowa èpamonḍhoeghǎ ḍǎ' Portlake, dhina sèngko' so Humphrey sè njarèa pèssè bărǎghǎddhǎ."
Kalagghoeǎnnèpon saamponna Eduard apessen ḍǎ' Sampson, (soro atorraghi ka towan Kobǎsa) djhǎ' abǎ'na palèmana sareng abǎliă lem-malem pas mangkat. Sanattolla ka tjompo'na, tan-trètanna ghi' èpangghi asarapan. Na'-kana' ghǎpanèka semmo sossa nèngalė Eduard potè ellaj. Saamponna marè asarapan, Humphrey ladjhoe èadjhǎk kalowar sareng Eduard.
