Hinarubay kan trompeta,
Su paglaog na maogma,
Ni Fernando sa Granada,
Na bulanos nang cristiana.
Dai na lámang nin wálat
Na tandá nin bakong bonyag;
Kan moros su mga bíhag,
Ki Isabel namantáag.98
Itong mga manlalaban,
Madásig, matiníos man,
Pinataratarang anán
Kan Monarca na maúgay;
Su Reina man nanaraytay
Mga limós na masamwang;
Mantang saró syang banal,
Na reina súkat magdánay.
Kan moros kan mádangog
Magagaya sa tanog,
Mga madaging na tambor,
Awit ngáning maogmahon,
Pinangagtangisan
Su saindang pálad,
Su muráway nindang
Pírit napahámak,
Su lahí nindang linúpig,
Bansá na daing kaagid.
Su mamondó nindang
Mga inagrángay,
Maíngat na gáyong
Rinimpos nin marhay,
Mga pakimayó,
Luhá kasarábay.
Sinda nahahandal,
Sakalé, mádangog
Kaitong tagumpay,
Muráway magorog,
Natúyong nadúsay,
Natao nin kolog.
- 98 Nagpahayag.
