This page has been validated.
— 10 —
AN PAGSAKAY
(Dálit sa mga Dumágat ni Magallanes)
Sa maogmang aldaw
Kan magalinsaga
Sa gamping Sirangan,
Tálang Makaaga,
Kan sa Barrameda,
Mamongáyang labat,
Di masábing ogma
Naghadé na háyag.
Ta su mga láyag
Sa may daragsaan,
Gabós hinurúnat
Sa mga sakayán;
Kan saindang batbat,
Nobleng manglalaban,
Dagang di talastas
Lubós masasakpan.
Gabós gayagaya,
Ogmang daing tapus,
Asin ta sa Lungsod,
Anán mamongaya;
Minaaniningal
Daging na makosog,
An mga gimbal
Naghahagobóhob.
Riboribóng potok
Sa gabós na dahong,
Aniningal laghod
Nin kagabsan na cañon;
Mga sandataan
Nin banwang kastilá
Nagtaraong gálang,
Ogma di kawasá.
