Page:Mga Binalaybay V.3.pdf/83

75

Yuhom ’ya sa akon gapakunyag
      nga daw matin-aw nga kaagahon,
Kag kon madula ang pagsalig
      ko sa mga kahapunanon
Nagaupod man ang akon dughan
      sa iya nga mga kasubo.
----------
Sa gab-i’ng lawod may likum. ...
      Ang iya tubig nga masinaw
Sang libulibo kag linibo
      nga mga sidlak napuno;
Ang kalangitan gatahum,
      hangin galibot nga mabugnaw,
Ang balod sa iya paghanol
      sa huyop nagadalawidaw
Sang maragtas nga gakadula
      sang sa panahon mga mantu.
----------
Nagasiling nga ginasugid
      unang’ aga sang kalibutan,
Ang nahaunang’ halok sang adlaw
      nga sang iya dughan nagsunog,
Sang ang libulibong' tinuga
      naggwa nga sa wala naggikan,
Kaidadalman ila ginpuy-an
      putokputokan subong man
Kag bisan diin iya ginbilin
      halok niyang’ makapabaskog.
----------
Apang kon sa gab-ing’ mangitngit
      hangin maghuyop sing makusog
Kag magsugod sa paghanol
      ang nagaaliwasang balod,
Sa hangin malatay ang singgit
      nga sang tawo nagapakurong,
Katulad sang nagapanghayhay
      nga nagaampo nga mga tingog
Nga tinusngaw sadto’ng kahapon
      nagkalalumos sa lawod.
----------
Hanti magasinabatsabat
      sa ibabaw mga kabukiran,
Ang mag kakahuyan sa utbong
      kag utbong magahilinulag;