3
Primu
5.
Ed ora stu sagrilegu tirannu
La jetta ntra un’orribili ruina
Cuntinuamenti jennula spugghiannu?
E farinni di nui carnificina.
O Diu di gloria e di vinnita, e quannu
Quannu si rumpirà la ria catina
Cu cui st’empiu Neruni sciliratu
L’infclici Sicilia ha straziatu ! —
6.
Mentri cussi stu nobili baruni
L’internu so rammaricu sfugava,
Piani ntra la sua menti a battagghiuni
Pr’una fera vinnitta immaginava;
Quannu trasu lu giuvini Simuni,
Chi antica nobiltà puru vantava,
Da lu gintili Ninfa accumpagnatu
A chi lu cori aveva cunsagratu.
7.
Era sta picciuttedda una di chiddi
Chi spiranu a guardalli un duci affettu;
L’ucchiuzzi soi parianu dui faiddi
Chi addumavanu ciami ad ogni pettu.
Larga lu frunti, biunni li capiddi,
Mustrava un vagu e seducenti aspettu.
Nsumma pri lu simpaticu so visu
Un ancilu paria di paraddisu.
