This page has not been proofread.
kulupu
toki tawa jan pi lipu tenpo: jan Ke Tami
jan Sonatan
jan Ke Tami o toki! sina pali e seme tawa lipu tenpo?
a, mi sitelen e sitelen musi. nimi ona li "kijetesantakalu[1] o". mi pana e toki. tenpo wan la, toki ni li ken toki sona. toki ante la mi toki e kulupu pi toki pona, e ijo pi toki
pona. ante la, mi pana e pona kepeken lukin mi.
pali pi lipu tenpo la ijo seme li pona mute?
musi li pona nanpa wan tawa mi. ijo musi wan li ni: jan Alonola li pana e toki nasa la, jan Tenten li sitelen sitelen e ni la, ni li wawa tawa mi. ante la, ni li pona mute tawa mi: mi ken kama sona e ijo mute anu pilin mute tan jan ante kepeken toki pona a. mi ken pilin musi mute tan toki musi.
ijo seme li ken pona kin e lipu tenpo?
lipu tenpo li awen pali la, ni li pona suli tawa mi. jan pi nasin ante mute li pali e toki tawa ona la ni li ken wawa e lipu tenpo. a ken la, mi ken kama sona e pona tan pali pi kulupu Epelanto.
sina pali e seme tawa pilin pona?
toki pona li pona e pilin mi. ante la, mi nasin e kulupu pi jan lili. kulupu ni li wile pilin musi tan lipu, tan pali sitelen kin. jan pi kulupu ni li jan pi pona suli.
tenpo seme en nasin seme la sina kama sona e toki pona?
tenpo sike pini wan la mi kama sona e ona. mi en kulupu lili pi jan pona mi li wile kama sona e ona la, mi kama sona e toki pona tawa pana sona. mi open e sona mi pi toki pona kepeken sitelen pi jan Misali, kepeken lipu pi jan Lentan. mi awen kama sona kepeken lipu pu.
sina kepeken ala kepeken e nimi pi pu ala?
a, mi wile ala. taso nimi "tonsi" en nimi "kijetesantakalu" en nimi "ku" li pona kin tawa mi la mi kepeken nimi ni. taso mi wile awen e lili nimi pi toki pona. mi wile awen lon nasin pu.
sina pali e seme lon lipu linluwi[2] sina [janketami.wordpress.com]?
mi pali pini e ijo pi toki pona la, mi pana e ni ale tawa lipu ni. ante toki mute pi toki pona li lon. tenpo pini la, mi pana e kalama musi tan telo suli. sitelen pi "jan Pepa&soweli Kawa" li kama sitelen musi pi toki pona la, mi pana e ona.
o pilin e ni: jan wan pi wile sina li kama sona e toki pona. jan seme o kama sona?
jan li lon poka mi la mi wile e ona pi toki pona lon tenpo ale a a a. taso jan Rebecca Sugar li jan pi musi wawa a. mi wile sona e ni: ona li ken pali e seme kepeken toki pona?
tenpo kama pi toki pona la ijo seme li suli tawa sina?
mi wile e ni: jan pi toki pona li pali e lipu suli. mi wile lukin e lipu pi toki pona lon luka mi lon. mi wile e lipu kalama kin. toki pona la, toki lipu pi mute ala li kepeken kalama. mi wile kama lon kulupu pi toki pona lon tenpo mute.
o awen pona!
pona o awen lon sina
