This page has not been proofread.
2
Pes pradets cercarèy de flous ;
Se las flous nou soun aboundousos,
Demèst las sègos espinousos
Ramassarèy de brouquillous.
Sur aquelo tèrro cherido
Daourejo un bèl coustou sacrat,
Doun la cimo s'es enlusido
Pes troubadours que l'an mountat;
Mès la routo es pla perillouso :
Es tant estreto et tant fangouso
Qu'un rimayre paouc coustumiè,
Se nou se malfiso, legueno,
Et toumbo dins un riou que meno
A la gourgo del debrembiè.
Ah ! s'aquel dangè me menaço
Al punt d'amourti moun ardou,
A toun coufin fayt-me uno plaço
Per rebiscoula ma bigou ;
S'al prèp de tu preni couratge,
Tentarèy mant pelerinatge
Sur aquel tupèl en renoum.
Hurous ! s'a la darnièro rengo
Des qu'an escriout dins nostro lengo
Poden un joun graba moun noum.
