77
Sè kaḍoewa pada boe-amboe sakeddjha'. Gulliver pas éadjhak onggha ka sala sèttongnga dhak ondhak mo'ghoemo'an sè bhaghoes; djădijă ladjhoe èangka'è dhă'ăr, sambi atjatja sè mabhoenga atè. Pardjadji djárèja atjarèta da' Gulliver bhab bhabhaddhá bán adhaddha nagháră djádija; sabháliggha, Gulliver ijá akandhǎ parkara adhǎt bán djoedhá naghără ana-barna è tana Erropa. Saomorra Gulliver ghi bhoeroe sakalian járja tao arassa'aghi senneng talèbăt.
Doewă arè abiddha Gulliver sè baḍa èkarang padhisa'an, ladjhoe èadjhǎk molè ka kotta, sabab Sang Moenodi, ija arèja Goepennorra kotta, ta' ngennèng bit-abit adhina'aghi pangghăbăjănna.
Kalagghoeǎnna Gulliver ghoe-nèngghoe ráng-bharang ana-barna neng è mosijoem bán è ko-bengko omom, èater bi' Sang Moenodi dhibi'.
Serrèna ella marè èèntarè băn ètèngghoe kabbhi apa sè parlo èkataoè nengè Lagado djárèja, Gulliver pas kèr-pèkkèran sè bhakal molèa da' naghăra Inggris, ladjhoe na'-karèna'an dhibi', bărǎmma akalla sè ghampanga.
Saabiddhă bădă neng è Lagado Gulliver ngèḍing kabăr, djhă' karadjhă’ănna Sang Rato è dadja èbatessè saghără radjăn, băn è ghir sèrèng djǎdijă bădă palabbhoeănna băn koṭṭa radjana, djǎ'-radja'ăn è saantèrona naghără. Kotta djǎrèja tjè' rammèna bhab liver. Molana abǎ'na rep-ngarep sè ngennènga napa' ḍǎ' Djeppang, ḍări djǎdijă bit-abit tanto băḍă kapal aladjar ḍa' tana Inggris.
Bhǎreng pèkkèrra ella todjoe' sè terro èntara ḍa' kotta palabbhoeăn è pasèsèr ḍădjă, Gulliver pas njo'on paamètan ḍǎ' pardjadji sè èponḍhoeghi. Pardjadji sè èponḍhoeghi ladjhoe marèngè sèttong pangater sè pènter băn băgăl dădoewa', sè sèttong èsoro tompa', sèttongnga soro boewǎ'i răng-bhărǎngnga. Laèn ḍări djárèja Gulliver ollè sorat, soro atorraghi ḍa' sèttong opsir tasè' neng-è palabbhoeăn Maldonado.
Gulliver amèt ḍa' Sang Moenodi, ladjhoe mangkat, antara pan-bărămpan arè sè adjhălăn ella napa' ḍă' palabbhoeăn. Edjǎdijă kabhenderrän taḍa' parao sèttonga sè aladjără ḍă' Loegnag. Gulliver ladjhoe ngatorraghi sorat ḍă' mo-sarmoanna Sang Moenoḍi, ijă arèja opsir tasè' ngèras bhandhar è Maldonado. Gulliver èpamondhoek è bengkona. Gulliver tjè' sossana bhăreng ngèḍing, djhă' ra-kèra ghi' saboelǎn agghi' sè bălă'ǎ parao dǎ' Loegnag.
Saabiddha anantè bădăna parao, bản sè épondhoeghi Gulliver èadjhǎk ghoe-nèngghoe ḍǎ' polo Geloebdoebderib, dări Maldonado djhǎoena nèng ra-kèra lèma eddjhăm.
