ऑक्सायड लेसरचो उपेग करून कारखान्यांत धातू जांव हेर वस्तूंपसून जाय आशिल्ल्या खास आकाराचें कुडके कापून तयार करपाची क्रिया स्वयंचलितपणान करूं येता. तशेंच जाय तशीं संकलित इलेक्ट्रॉनीय मंडलां कापून काडपाखातीर जांव शिंवपाखातीर कपडो वेवस्थीत कापपाखातीरूय लेसराचो उपेग करतात.
८) वितळजोडकाम कार्बन डाय- ऑक्सायड संतत तरंग १,००० ते १५,००० वॉट लेसरच्या आदारान वेगवेगळ्या धातूंत वितळ- जोडकाम करपाक येता.
९) वैजकीय सुविधा वैजकीय शस्त्रक्रियेंत लेसरचो उपेग करून शरीर- चिकित्सा घेवं येता. कापिल्ले कातीचेर शलाकेकलागून निर्माण जाल्ल्या उच्च तापमानाकलागून वांगडा दाहकर्मय जाता आशिल्ल्यान लेसर शलाकेच्या आदारान केल्ली शस्त्रक्रिया रगताबगर जाता. आतकड्यांचेर निर्माण जाल्ल्या घायांतल्यान रगतस्त्रव थांबोवपाखातीर जांव दोळ्यांतलें दृक्पटल विस्थापित जाल्यार तें वितळजोड क्रियेच्या आदारान साधून परत मूळ जाग्यार बसोवपाखातीर जांव काळजाचे शिरेंत आडखळ निर्माण जावन ती बंद जाल्यार ते आडखळीक बुराक मारपाखातीर लेसर शलाका वापरतात. तशेंच ज्या जाग्यार शस्त्रक्रियेखातीर सुरी सोंपेपणी पावपाक शकना अशा जाग्यार लेसर शलाका ऊर्जा तंतूच्या आदारान व्हरतात. व्हायरस संसर्गाकलागून योनिमार्गात निर्माण जाल्ल्या चामखिळासारक्या वाडीचें निर्मूलन करपाखातीर जांव गर्भाशयापसून जावपी अपसामान्य रगतस्त्राव थांबोवपाखातीर लेसर शलाकेचो उपेग जाता. शरीरांत ज्या जाग्यार उदक नाका आसता ताच्या उपायाखातीर कार्बन डायऑक्सायड लेसर शलाका चड प्रभावी थारता. शरीरांतल्या हेर नाजूक जाग्यांनी वापरपाखातीर एक्सायमर लेसर शलाका उपेगी थारता. आरगॉन लेसरच्या आदारान कोलॅजेनांत हाडां तशेंच कात आनी स्नायुरज्जू हांच्यातल्या तंतुमय प्रथिनांत उजवाडरसायनीक विक्रिया घडोवन हाडूं येता. आरगॉन पंप रंजक लेसरच्या आदारान रगतदात्याच्या रगतांतलें परिसर्प, यकृत शोथ- ब, श्वेतकोशिकार्बुद ह्या रोगांचे व्हायरस नश्ट करपाक येतात.
१०) लश्करी उपेग एकाद्या जाग्यापसून दुसऱ्या खंयच्याय थारायल्ल्या जाग्याचें अंतर थारावपाखातीर लेसरचो उपेग जाता, लक्ष्य वेधन करपाखातीर लेसर शलाका वापरतात. अमेरिकेच्या स्मार्ट बॉबा चें YAG प्रकाराच्या लेसरच्या आदारान मार्गदर्शन केल्ल्यान तो नेम धरिल्ल्यान जाग्याचेर अचूकपणान पडटा. क्षेपणास्त्रां, नाळ आनी रायफलीसारकीं ल्हान शस्त्रां हांचेखातीरूय लेसरचो उपेग करतात. नेम धरिल्ल्या जाग्याचें अचून अंतर समजुपाखातीर लेसर परासमापकाचो वापर करूं येता. विखारी वायूचें अस्तित्व वळखुपाखातीर लेसर शलाकेचो उपेग करपी संवेदनशील उपकरण तयार केलां. रसायनीक ऊर्जेन उत्तेजित केल्ल्या लेसरच्या आदारान रणगाडे आनी विमानविरोधी क्षेपणास्त्रांचो नाश करूं येता. खर लेसर उजवाड क्षेपणास्त्राचेर पडल्यार उश्णतेकलागून ताच्या भायल्या आवरणाचो नाश जाता, जांव ताच्या भितरल्या इलेक्ट्रॉनीय नियंत्रण प्रणालीचो नाश जावन तें सकयल पडटा.
११) अणुकेंद्रीय संघटना विक्रिया घनिकृत ड्यूटेरियम वा ट्रिटियम वा ड्यूटेरियमयुक्त पॉलिएथिलिनाची सु. ०.२ मिमी.ची गुळी तयार करून तिचेर एकाच वेळार जायत्या उच्च ऊर्जा लेसर उजवाडाचो झोत सोडटकच थंय व्हडा प्रमाणांत उश्णता निर्माण जावन थंयच्या पदार्थांचें बाश्पीभवन जाता आनी तातुंतल्यान सामक्या उण्या काळांत एके उच्च तापमानाची खर अशी गुटीका निर्माण जाता.
१२) लेसर उजवाड रसायनशास्त्र ह्या भौतिकीय रसायनशास्त्राच्या फांट्यांत लेसर उजवाडान रसायनीक विक्रिया प्रवर्तित, रुपांतरित वा संनियंत्रित करपांत येवन तांच्या गतिविज्ञानाचो अभ्यास करपाक येता. एक - आघाती रसायनीक विक्रियेंतल्या मदल्या टप्प्याचो सोद घेवपाखातीर लेसर किरणांचो बरो उपेग जाता. हे पध्दतींत खाशेल्या तरंगलांबायेच्या लेसर किरणांचो वापर करून एके खाशेले अवस्थेंत आसपी रेणू निर्माण करून तांच्या आदारान रसायनीक विक्रियेचो अदमास घेवं येता. तशेंच सामान्य तापमानाक ज्यो विक्रिया घडून येनात त्यो लेसरच्या आदारान घडोवन हाडूं येतात. १० -१२ सेकंदाच्या खर लेसर स्पंदांच्या आदारान बेगीन घडपी भौतिक आनी रसायनीक विक्रियांचो अभ्यास करूं येता.
१३) नैकरेशीय प्रकाशकी लेसरच्या सोदापयलीं माध्यमाचे उजवाडीय गुणधर्म हे उजवाडकिरणांच्या खरपणाचेर आदारून रावनात अशें मानतात. लेसर उजवाडाची खरता खूब चड आशिल्ल्यान तातुंतलें विद्युत क्षेत्र १० - १० वोल्ट सेंमी. इतकें व्हड आसता. लेसर उजवाडाच्या ह्या विद्युत क्षेत्राचो द्रव्य माध्यमाचेर परिणाम जाता आनी ताकालागून खूब असाधारण अशे वेगवगेळे परिणाम घडून येतात. त्या परिणामांचें विवेचन नैकरेशीय उजवाडांत करतात.
१४) लिडार धर्तरेच्या वातावरणांतल्या ल्हान कणांच्या अभिज्ञानाखातीर उजवाडीय रडार म्हणजे लिडार उपेगी थारता. हातूंत लेसर उजवाडाचे स्पंद धाडटात आनी वातावरणांतल्या कणांकलागून प्रकीर्णीत जाल्लो उजवाड ओडून घेता. ह्या पार्श्वप्रकीर्णीत लेसर स्पंदाच्या खरतायेवयल्यान आनी प्रेशीत स्पंद आनी ग्रहण केल्लो स्पंद हातुंतल्या कालखंडावयल्यान वायुकलिल द्रव आनी घन सामक्या सूक्ष्म कणांचें वायूतलें निलंबन , वातावरणांतल्या वेगवेगळ्या वायूंची दाटसाण आनी अंतर, वातावरणांतली धुसरता आनी दृश्यमानता हांचेविशीं म्हायती मेळपाक शकता.
फुडाराक लागींलागीं सगळ्या मळांचेर लेसरचो वापर गरजेचो थारपाची शक्यता आसा. विज्ञानांतल्या जायत्या संशोधन विभागांखातीर लेसर तंत्र उपेगी थारता. आयन रोपण केल्ल्यान
