UPOKO 7, 8.
2 Tangohia mai e koe etahi o nga kirehe pokekore, kia takiwhitu, te toa raua ko tana uha: me nga kararehe poke hoki, kia takirua, te toa raua ko tana uha.
3 Me nga manu ano hoki o te rangi, kia takiwhitu, te toa raua ko te uha; kia ora ai he uri ki runga ki te mata o te whenua katoa.
4 Ta te mea hoki kia whitu ake nga ra ka whakauaina e ahau te ua ki runga ki te whenua, a kia wha tekau nga ra, kia wha tekau nga po; a ka whakangaromia atu e ahau i runga i te mata o te whenua nga mea ora katoa i hangā e ahau.
5 A rite tonu ta Noa i mea ai ki nga mea katoa i whakahaua mai e Ihowa ki a ia.
6 A e ono rau nga tau o Noa i te putanga mai o te waipuke ki runga ki te whenua.
7 ¶ Na, ka haere a Noa ratou tahi ko ana tama ko tana wahine, me nga wahine a ana tama, ki roto ki te aaka, i te wehi i nga wai o te waipuke.
8 Me etahi o nga kirehe ma, o nga kirehe hoki kahore i ma, o nga manu hoki, o nga mea katoa ano hoki i ngokingoki i runga i te whenua;
9 I haere takirua ratou ki roto ki te aaka ki a Noa, te toa raua ko te uha, i pera tonu me ta te Atua i whakahau ai ki a Noa.
10 A ka whitu nga ra, na, ka puta mai nga wai o te waipuke ki runga ki te whenua.
11 ¶ No te ono rau o nga tau o te oranga o Noa, no te rua o nga marama, no te tekau ma whitu o nga ra o te marama, no taua rangi ano i pakaru mai ai nga matapuna katoa o te rire nui, a ka whakatuwheratia nga matapihi o te rangi.
12 A e wha tekau nga ra e wha tekau nga po i ua ai te ua ki runga ki te whenua.
13 No taua tino rangi ano i haere ai a Noa, ratou ko Hema, ko Hama, ko Iapeta, nga tama a Noa, ratou tahi ko te wahine a Noa, ko nga wahine tokotoru ano hoki a ana tama, ki roto ki te aaka;
14 Ratou ko nga kirehe mohoao katoa, o ia ahua o ia ahua, me nga kararehe katoa, o ia ahua o ia ahua, me nga mea ngoki katoa e ngokingoki nei i runga i te whenua, o ia ahua o ia ahua, me nga manu katoa, o ia ahua o ia ahua, me nga mea whai parirau katoa, o ia ahua o ia ahua.
15 Na, ka haere atu ki roto ki te aaka ki a Noa, tātakirua o nga kikokiko katoa, o nga mea whai wairua ora.
16 A i haere atu nga mea i haere ko te tane ko te wahine o nga kikokiko katoa, he pera tonu me ta te Atua i whakahau ai ki a ia: a tutakina atu ana ia e Ihowa ki roto.
17 A e wha tekau nga ra o te waipuke ki runga ki te whenua; a ka nui haere nga wai, a whakamanuria ake ana te aaka, a ka maiangi ake ki runga i te whenua.
18 Na, ka kaha nga wai, a ka tino nui haere ki runga ki te whenua; a ka tere te aaka i runga i te kare o nga wai.
19 Na, kua tino kaha rawa nga wai ki runga ki te whenua; a ka taupokina nga maunga teitei katoa i raro iho i te rangi, puta noa puta noa.
20 Kotahi tekau ma rima nga whatianga i pari ake ai nga wai; a taupokina ana nga maunga.
21 Na, ka mate nga kikokiko katoa i korikori i runga i te whenua; te manu, te kararehe, te kirehe, nga mea ngoki katoa hoki i ngokingoki i runga i te whenua, me nga tangata katoa ano hoki:
22 I mate katoa nga mea kei roto nei i o ratou pongaihu te manawa ora, nga mea hoki i te tuawhenua.
23 A ngaro iho nga mea ora katoa i runga i te mata o te whenua, te tangata, te kararehe, nga mea ngokingoki, me te manu o te rangi; i whakangaromia atu ratou i runga i te whenua: a toe ake ko Noa anake, me nga mea i a ia i roto i te aaka.
24 A kotahi rau e rima tekau nga ra i huri ai nga wai ki runga ki te whenua.
UPOKO 8.
A KA mahara te Atua ki a Noa, ki nga mea ora katoa hoki, me nga kararehe katoa ano hoki i a ia i roto i te aaka: na, ka mea te Atua kia tika atu tetahi hau i runga i te whenua, a ka hoki iho nga wai.
2 A ka tutakina atu nga matapuna o te rire, me nga matapihi o te rangi, whakamutua ano hoki te ua o te rangi;
3 Na, ka hoki haere nga wai i runga i te whenua: a i te mutunga o nga ra kotahi rau e rima tekau kua iti iho nga wai.
4
A i tau iho te aaka i te whitu o nga marama, i te tahi tekau ma whitu o nga ra o te marama, ki runga ki nga maunga o Ararata.
7
