꧋ꦥꦢꦸꦏꦠꦸꦮꦤ꧀ Prof. Dr. C. SNOUCK HURGRONJE
꧋ꦥꦫꦩꦲꦺꦴꦱ꧀ꦠꦩ꧀ꦠꦸꦤꦶꦥꦸꦤ꧀ꦱꦩꦶꦧꦺꦴꦠꦼꦤ꧀ꦏꦏꦶꦭꦥꦤ꧀꧈ꦱꦶꦤ꧀ꦠꦼꦤ꧀ꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦲꦸꦂꦒꦚ꧀ꦗꦺꦥꦸꦤꦶꦏ꧈ꦲꦶꦁꦒꦶꦃꦥꦸꦤꦶꦏꦱꦠꦸꦁꦒꦶꦭꦶꦁꦥꦸꦗꦁꦒꦲꦒꦼꦁꦲꦶꦁꦤꦒꦫꦶꦮꦭꦤ꧀ꦢꦶ꧈ꦲꦶꦁꦏꦁꦩꦶꦱꦸꦮꦸꦂꦲꦱ꧀ꦩꦤꦶꦥꦸꦤ꧀ꦲꦶꦁꦱꦻꦤ꧀ꦢꦼꦔꦶꦁꦧꦮꦤ꧉ꦱꦱꦩ꧀ꦥꦸꦤꦶꦥꦸꦤ꧀ꦱꦮꦠꦮꦶꦱ꧀ꦠꦻꦴꦤ꧀ꦔꦱ꧀ꦠꦲꦢ꧀ꦥꦶꦱꦸꦂꦆꦤ꧀ꦭ꧀꧉ꦗ꦳ꦏꦺꦤ꧀ꦲꦶꦁꦠꦤꦃꦆꦤ꧀ꦢꦶꦪꦔꦿꦶꦏꦶ꧈ꦮꦱꦤꦤꦶꦥꦸꦤ꧀ꦭꦗꦼꦁꦏꦠꦼꦠꦼꦥꦏꦼꦤ꧀ꦢꦢꦺꦴꦱ꧀ꦒꦸꦫꦸꦲꦒꦼꦁꦲꦶꦁꦥꦩꦸꦭꦔꦤ꧀ꦫꦸꦲꦸꦂꦲꦶꦁꦭꦺꦲꦶꦝꦼꦤ꧀꧉ꦱꦩꦁꦏꦺꦱꦩ꧀ꦥꦸꦤ꧀ꦏꦊꦉꦱ꧀ꦪꦸꦱ꧀ꦮ꧇꧗꧐꧇ꦠꦻꦴꦤ꧀꧈ꦱꦲꦭꦗꦼꦁꦱꦺꦭꦺꦃꦥꦏꦂꦪꦤ꧀꧉ꦆꦁꦱꦫꦺꦃꦤꦶꦁꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦲꦸꦂꦒꦚ꧀ꦗꦺꦮꦻꦴ꧈ꦏꦛꦃꦱꦔꦼꦠ꧀ꦊꦭꦧꦼꦠꦤꦶꦥꦸꦤ꧀ꦠꦸꦩꦿꦥ꧀ꦧꦁꦱꦆꦤ꧀ꦢꦶꦪꦔꦿꦶꦏꦶ꧈ꦱꦪꦩꦭꦶꦃꦠꦸꦩꦿꦥ꧀ꦒꦺꦴꦭꦺꦴꦔꦤ꧀ꦆꦱ꧀ꦭꦩ꧀꧈ꦲꦩꦶꦭꦱꦩ꧀ꦥꦸꦤ꧀ꦢꦢꦺꦴꦱ꧀ꦮꦗꦶꦧꦶꦥꦸꦤ꧀ꦠꦸꦮꦶꦤ꧀ꦥꦤ꧀ꦠꦼꦱ꧀ꦱꦔꦼꦠ꧀ꦏꦗꦮꦺꦤ꧀ꦲꦔꦤ꧀ꦝꦫꦏꦼꦤ꧀ꦱꦮꦠꦮꦶꦱ꧀ꦩꦼꦁꦒꦃꦊꦭꦩ꧀ꦥꦲꦤꦶꦥꦸꦤ꧀ꦱꦁꦩꦶꦤꦸꦭꦾꦮꦻꦴ꧉ꦱꦪꦼꦏ꧀ꦠꦺꦴꦱꦶꦥꦸꦤ꧀ꦲꦔꦺꦭ꧀ꦱꦔꦼꦠ꧀ꦲꦔꦤ꧀ꦝꦫꦏꦼꦤ꧀ꦊꦭꦩ꧀ꦥꦲꦤꦶꦥꦸꦤ꧀ꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦲꦸꦂꦒꦚ꧀ꦗꦺꦲꦶꦁꦏꦁꦠꦤ꧀ꦥꦲꦚꦫꦶꦪꦺꦴꦱꦏꦼꦤ꧀ꦥꦢꦩꦼꦭꦤꦶꦥꦸꦤ꧀꧉ꦆꦁꦔꦿꦶꦏꦶꦏꦺꦔꦶꦁꦏꦕꦫꦶꦪꦺꦴꦱꦏꦼꦤ꧀꧈ꦧꦶꦭꦶꦃꦥꦢꦩꦼꦭꦤ꧀ꦲꦶꦁꦒꦶꦃꦊꦭꦩ꧀ꦥꦲꦤꦶꦥꦸꦤ꧀꧈ꦊꦭꦩ꧀ꦥꦲꦤ꧀ꦲꦶꦁꦒꦶꦃꦥꦢꦩꦼꦭꦤꦶꦥꦸꦤ꧀꧉ꦩꦶꦭꦲꦶꦁꦒꦶꦃꦲꦮꦶꦱ꧀ꦠꦶꦪꦁꦥꦶꦤ꧀ꦠꦼꦂꦠꦸꦂꦮꦼꦏꦼꦭ꧀ꦲꦶꦁꦢꦩꦼꦭ꧀ꦏꦢꦺꦴꦱ꧀ꦢꦺꦤꦺꦥꦢꦸꦏꦠꦸꦮꦤ꧀ Prof. Dr. C. Snouck Hurgronje ꦥꦸꦤꦶꦏ꧉
[gambar]
꧋ꦩꦼꦁꦒꦃꦠꦼꦧꦤꦶꦁꦥꦢꦩꦼꦭꦤ꧀ꦲꦶꦁꦏꦁꦢꦶꦥꦸꦤ꧀ꦱꦫꦶꦫꦤꦶꦏꦤ꧀ꦛꦶꦭꦸꦩꦶꦤ꧀ꦠꦸꦤꦶꦁꦥꦁꦒꦒꦱ꧀ꦲꦶꦁꦱꦊꦧꦼꦠꦶꦁꦱꦤꦸꦧꦫꦶꦤꦶꦥꦸꦤ꧀ꦠꦸꦮꦤ꧀ Prof. Dr. C. Snouck Hurgronje ꦥꦸꦤꦶꦏꦱꦪꦼꦏ꧀ꦠꦺꦴꦱ꧀ꦧꦺꦴꦠꦼꦤ꧀ꦤꦩꦲꦭꦶꦠ꧀꧉ꦠꦸꦩꦿꦥ꧀ꦥꦔꦸꦢꦶꦤꦶꦥꦸꦤ꧀ꦱꦮꦂꦤꦶꦤꦶꦁꦏꦮꦿꦸꦃꦮꦺꦠꦤꦤ꧀ꦲꦶꦁꦏꦁꦱꦪꦢꦔꦸꦱꦪꦏꦼꦕꦸꦏꦸꦥ꧀ꦠꦸꦮꦶꦤ꧀ꦲꦚꦼꦏꦥꦶ꧈ꦮꦺꦴꦤ꧀ꦠꦼꦤ꧀ꦱꦥꦺꦫꦔꦤ꧀ꦲꦶꦁꦏꦁꦥꦿꦱꦱꦠ꧀ꦢꦶꦥꦸꦤ꧀ꦊꦩ꧀ꦥꦫꦏꦏꦼꦤ꧀꧈ꦲꦶꦁꦒꦶꦃꦥꦸꦤꦶꦏꦲꦶꦁꦧꦧ꧀ꦏꦮꦿꦸꦃꦲꦶꦁꦏꦁꦒꦼꦒꦪꦸꦠꦤ꧀ꦏꦭꦶꦲꦤ꧀ꦲꦒꦩꦶꦆꦱ꧀ꦭꦩ꧀꧈ꦤꦔꦶꦁꦩꦼꦁꦒꦲꦶꦁꦥꦼꦥꦛꦺꦴꦏꦤ꧀ꦲꦶꦁꦏꦁꦥꦽꦭꦸꦥꦽꦭꦸꦠꦸꦩꦿꦥ꧀ꦒꦼꦱꦔꦶꦥꦸꦤ꧀ꦠꦼꦠꦶꦪꦁꦲꦶꦁꦏꦁꦱꦩꦶꦔꦿꦱꦸꦏ꧀ꦝꦠꦼꦁꦲꦒꦩꦶꦮꦻꦴ꧈ꦥꦸꦤꦶꦏꦲꦶꦁꦏꦁꦏꦻꦴꦢꦶꦏꦤ꧀ꦛꦶꦠꦸꦩꦼꦩꦼꦤ꧀ꦢꦺꦤꦶꦁꦥꦢꦸꦏꦠꦸꦮꦤ꧀ Snouck꧉ꦆꦁꦏꦁꦩꦏꦠꦼꦤ꧀ꦮꦻꦴꦤꦩꦢꦺꦢꦺꦥꦢꦩꦼꦭꦤ꧀ꦲꦶꦁꦏꦁꦒꦩ꧀ꦥꦶꦭ꧀꧈ꦲꦩꦂꦒꦶꦱꦒꦼꦢꦶꦥꦸꦤ꧀ꦏꦊꦏ꧀ꦱꦤꦤ꧀ꦱꦢꦪꦏꦼꦢꦃꦏꦤ꧀ꦛꦶꦠꦶꦤ꧀ꦢꦏ꧀ꦠꦸꦩꦼꦩꦼꦤ꧀꧈ꦲꦶꦁꦏꦁꦏꦥꦶꦱꦤ꧀ꦏꦼꦢꦃꦱꦒꦼꦢ꧀ꦝꦠꦼꦁꦧꦱꦄꦫꦧ꧀ꦲꦶꦁꦏꦁꦱꦪꦼꦏ꧀ꦠꦺꦴꦱ꧀꧈ꦥꦔꦽꦠꦺꦴꦱꦶꦥꦸꦤ꧀
