Dimano djawi nan kakanjang
bagubalo ditapi ngarai
dimano hati nan kasanang
sadang kasiah badan batjarai
Luruih djalan ka Pajakumbuah
salasiah betimba djalan
dimano hati tidak karusuah
sadang kasiah Saudah badjalan
Gadang aia Sungai Batang
tarandam batang saliguri
disangko paneh sampai patang
kironjo hudjan tangah hari
disiang tidak tasiang
tiok disiang tumbuah djuo
dirintang tidak tarintang
tiok dirintang rusuah djuo
Susah hati Karudia duduak bamanuang manuang sorang tabajang rupo Saudah tabajang galak geleng mato raso mahimbau-himbau djuo tamanuang dibatang aia maliek biduak hilia mudiak raso disulami Sungai Musi nak samo hilang djo Saudah sadang bamanuang manuang sorang datang kawan-njo Sutan Zainudin bakato sadang bapantun
Babiduak usah badajuang
badajuang badai kok tibo
duduak usah bamanuang
bamanuang sansai kok tibo
Mandanga kato nan bak kian takadiuik Bagindo Karudin diengo tjando kabalakang kironjo Sutan Zainudin mandjawab Bagindo Karudin
Babiduak mangko badajuang
nek Jakeb sampai kasubarang
dudusk mangko bamanuang
balain huntueng dari urang
